У райвыканкаме адбылося пасяджэнне міжведамаснага каардынацыйнага савета пад кіраўніцтвам намесніка старшыні райвыканкама Леаніда Бурака з удзелам спецыялістаў зацікаўленых арганізацый, прадпрыемстваў па недапушчэнні пранікнення афрыканскай чумы свіней (АЧС) на тэрыторыю раёна.
Хваляванні па азначанай праблеме ўзніклі не на пустым месцы: эпізаатычная сітуацыя па гэтым захворванні жывёл у Расійскай Федэрацыі рэзка пагоршылася. Чума ў суседзяў распаўсюджваецца даволі хутка. “На цяперашні час АЧС зарэгістравана на тэрыторыі 22 расійскіх рэгіёнаў, ад Краснадарскага краю да Архангельскай вобласці, — адзначыў намеснік галоўнага ветэрынарнага ўрача Капыльскага раёна Леанід Паляшчук. — Таму кіраўнікам прадпрыемстваў, арганізацый першачаргова неабходна разгледзець пытанні няўхільнага выканання прафілактычных мерапрыемстваў”.
Заражэнне здаровых свіней адбываецца пры сумесным утрыманні з інфіцыраванымі жывёламі, а смяротнасць пагалоўя можа складаць да 100%. У эпізаатычным ачагу знішчаецца ўсё пагалоўе, у тым ліку і свойскае. Адсюль зразумела, што эканамічны ўрон пры ўзнікненні захворвання будзе проста каласальным. Фактарамі перадачы віруса могуць стаць яшчэ і корм, пашы, транспартныя сродкі, забруджаныя выдзяленнямі хворых жывёл. Механічнымі пераносчыкамі з’яўляюцца таксама птушкі, дамашнія і дзікія жывёлы, грызуны, наскурныя паразіты, якія былі ў кантакце з хворымі і загінуўшымі свіннямі. Як бачна, фактараў распаўсюджвання больш чым дастаткова.
Прафілактычныя мерапрыемствы прадугледжваюць, у прыватнасці, арганізацыю поўнага збору (у спецыяльныя прамаркіраваныя кантэйнеры) і ўтылізацыю (тэрмічная апрацоўка) біялагічных і харчовых адходаў на перапрацоўчых прадпрыемствах, у сталовых, рэстаранах і іншых пунктах грамадскага харчавання, у тым ліку — на аб’ектах прыдарожнага сэрвісу. У гаспадарках, якія займаюцца свінагадоўляй, рэкамендавана забяспечыць біялагічную ахову ферм і арганізаваць іх работу па прынцыпе прадпрыемстваў закрытага тыпу.
Былі разгледжаны пытанні транспарціроўкі і рэалізацыі свіней. У прыватнасці, падчас здачы жывёлы са свінагадоўчых сельгасарганізацый дастаўка праводзіцца выключна аўтатранспартам, які належыць мясаперапрацоўчым прадпрыемствам, з наступнай абавязковай яго дэзінфекцыяй перад кожнай пагрузкай. Леанід Пятровіч засяродзіў увагу прысутных на забароне ўвозу з небяспечных краін і рэгіёнаў жывых свіней, спермы кныроў, мяса свініны і прадуктаў яе перапрацоўкі, скураной і кішачнай сыравіны, шчаціння, дзікоў (рэалізацыя іх мяса на рынках, кірмашах), паляўнічых трафеяў, кармоў і кармавых дабавак для жывёл, а таксама абсталявання, якое выкарыстоўвалася для ўтрымання, забою і раздзелкі свіней. У гэтай сувязі трэба перагледзець і адмяніць дагаворы, якія заключаліся раней з замежнымі пастаўшчыкамі.
Як паведаміў намеснік начальніка Капыльскага РАНС Віктар Гняцько, у раёне з 17 па 20 красавіка пройдуць вучэнні па адпрацоўцы дзеянняў тэрміновага рэагавання на выпадак узнікнення афрыканскай чумы свіней.
У сувязі з вышэйпералічаным, у арганізацыях павінны распрацаваць комплекс патрэбных мер з назначэннем адказных па кожным ахоўным мерапрыемстве.
Як вядома, захворванне лепш папярэдзіць. Тым больш што афрыканская чума ў Міжнароднай класіфікацыі адносіцца да спісу А — асабліва небяспечных вірусных захворванняў жывёл.
Сяргей ЛАЗОЎСКІ
Фота аўтара
На здымку: Падчас семінара.
СУБОТНІК. 14 красавіка жыхары Капыльшчыны прынялі ўдзел у абласным суботніку. У асноўным наводзіўся парадак на замацаваных тэрыторыях. Прадстаўнікі райвыканкама і некаторых гарадскіх арганізацый прыбіралі схіл каля старога возера. Супрацоўнікі аддзелаў адукацыі, культуры, упраўлення райсельгасхарчу, падатковай інспекцыі збіралі камяні ў ААТ “Старыца-Агра”.
АЦЯПЛЕННЕ. У нашым раёне закончыўся ацяпляльны сезон. З 13 красавіка пачалося адключэнне жыллёвага фонду, а з 16 красавіка спынілася падача цяпла ва ўстановы адукацыі, аховы здароўя і іншыя.
СЕМІНАР. З 25 па 26 красавіка для дырэктароў РЦК і гарадскіх Дамоў культуры, супрацоўнікаў раённых метадычных цэнтраў адбудзецца абласны семінар-практыкум “Традыцыйныя і сучасныя формы работы клубных устаноў Капыльскага раёна з падлеткамі асацыяльных паводзін і нядобранадзейнымі сем’ямі”.
КВЗ. У Салігорску прайшоў ІІ абласны фестываль гульняў вясёлых і знаходлівых сярод навучэнскай і працоўнай моладзі. Усяго выступіла 17 каманд з 14 раёнаў Мінскай вобласці. Зборная Капыльшчыны вярнулася дамоў з дыпломам і каштоўнымі падарункамі.
АКЦЫЯ. З 21 па 28 красавіка пройдзе добраахвотная акцыя «Тыдзень лесу», у ходзе якой работнікі лясгаса, члены школьных лясніцтваў і БРСМ, старшакласнікі прымуць удзел у лесапасадцы больш за 90 тыс. саджанцаў на плошчы 13,7 га, навядзенні парадку ў лясных масівах.
РАБОТАЮТ ТЕЛЕФОНЫ:
областной экстренной круглосуточной психологической службы «Телефон доверия» — (8-017) 202-04-01;
областной телефонной линии наркологической помощи — (8-017) 331-90-64, по которому можно получить информацию о специализированной наркологической помощи в организациях здравоохранения области;
областной телефонной линии «зеленый номер» — (8-801) 100-51-51, по которому граждане могут предоставлять информацию о правонарушениях, связанных с незаконным оборотом наркотиков.
Работа па навядзенні парадку вядзецца ўсімі прадпрыемствамі, установамі, размешчанымі на тэрыторыі сельсавета, а таксама 11 капыльскімі арганізацыямі. Актыўна дапамагае ў гэтым мясцовае насельніцтва, старэйшыны вёсак. Першымі набылі больш прывабны выгляд цэнтральныя вуліцы населеных пунктаў. У дадатак, ліквідаваны шэсць стыхійных сметнікаў, спілавана восем аварыйна-небяспечных дрэў. У в. Слабада-Кучынка і аг. Старыца акультураны помнікі, мемарыялы. Сельгаспрадпрыемства ААТ “Старыца-Агра” пачало зносіць старыя непрывабныя будынкі, адзін з якіх сёлета ліквідаваны ў в. Свідзічы. Напярэдадні велікодных свят на грамадзянскія могілкі падвезены пясок. Ужо пасля з іх тэрыторыі будзе вывезена смецце.
Як адзначыла старшыня сельвыканкама Нэлі Гусева, асабліва не спяшаюцца з навядзеннем парадку на сваіх сядзібах дачнікі. Ім высланы адпаведныя прадпісанні. А ўвогуле на тэрыторыі сельсавета знаходзяцца 32 пустуючыя сядзібы, на 18 з іх прыбрана смецце, высечана непатрэбнае кустоўе, дрэвы.
З надыходам цёплага, сонечнага надвор’я работы па добраўпарадкаванні яшчэ больш актывізуюцца.
Сяргей ЛАЗОЎСКІ
Фота аўтара
