[caption id="attachment_6645" align="aligncenter" width="580" caption="Рапарт прымае старшыня райвыканкама А. Жданеня"]
[/caption]
Штогод на Капыльшчыне праводзяцца дзясяткі розных акцый, спартыўных спаборніцтваў, мэта якіх — папулярызацыя і развіццё фізкультурна-аздараўленчай і спартыўна-масавай работы, прапаганда здаровага ладу жыцця. Вось і ў мінулую суботу аддзел фізкультуры, спорту і турызму райвыканкама запрасіў на зімовую спартакіяду прадстаўнікоў арганізацый, прадпрыемстваў і ўстаноў Капыля. Калі для працаўнікоў аграпрамысловага комплексу такія спаборніцтвы сталі традыцыйнымі, то для гарадскіх структур усё адбывалася ўпершыню.
26 каманд прыбылі на фізкультурна-аздараўленчы комплекс. Спаборніцтвы праходзілі ў добразычлівай і сяброўскай атмасферы. Каманды спаборнічалі ў такіх жа самых дысцыплінах, як і сельскія аматары здаровага ладу жыцця: лыжных гонках, плаванні, дартсе. Апошнім відам, які ўваходзіў у агульнакамандны залік, была камбінаваная эстафета.
[caption id="attachment_6460" align="aligncenter" width="443" caption="Каманда-пераможца Цэнтра банкаўскіх паслуг №609 у г. Капылі філіяла №620 ААТ «ААБ Беларусбанк» у г. Нясвіжы"]
[/caption]
Лепшымі плаўчыхамі ў асабістым заліку сталі Ірына Міхайлоўская (ЖКГ), Ганна Скуба (ЦРБ) і Людміла Хаміцэвіч (РАА), якія на п’едэстале гонару размясціліся, адпаведна, на першым, другім і трэцім месцах. У мужчын пратакол выглядаў наступным чынам: I – Уладзімір Кандраценя (лясгас), II – Дзмітрый Фядотаў (ЖКГ), III – Віталь Стрэлкін (аддзел адукацыі). У выніковай табліцы дуэт жыллёва-камунальнай гаспадаркі стаў першым у плаванні. Другое месца дасталося аддзелу адукацыі, а трэцяе – аддзелу дэпартамента “Ахова”.
Хуткасці не інакш як на самых прэстыжных спаборніцтвах паказвалі ў гонках некаторыя лыжнікі. Так, пераможца Таццяна Маліноўская з аддзела дэпартамента “Ахова” пераадолела кіламетровую дыстанцыю за 2.41. Хуткія секунды паказала і ўладальніца другога месца Вікторыя Рудая (3.03). Хвіліну лідару саступіла Наталля Філазафовіч з Беларусбанка, якая стала трэцяй. Удвая большую дыстанцыю за 3.51 праляцеў Яўген Карзей з аддзела дэпартамента “Ахова”. 16 секунд аддзялілі Дзмітрыя Гурбана з аддзела па надзвычайных сітуацыях ад верхняй прыступкі п’едэстала гонару. Ён – на другім месцы. Трэці час паказаў Сяргей Місючэнка з ЖКГ (5.24). Лідарамі каманднага заліку сталі супрацоўнікі дэпартамента “Ахова”. Другое месца – у камунальнікаў, трэцяе – у работнікаў беларусбанка.
[caption id="attachment_6461" align="aligncenter" width="443" caption="В. Бенеш, С. Лазоўскі, С. Захарык прымаюць віншаванні"]
[/caption]
Цвёрдасць рукі дэманстравалі ўдзельнікі дартсу. Мацнейшай сярод жанчын стала Ірына Літвінка з Капыльскага СПЛ. Другую прыступку п’едэстала гонару заняла Наталля Гарбацэвіч, якая прадстаўляла райвыканкам. Трэцяе месца выявілася толькі пасля паўторнай спробы, дзе вытрымку праявіла Ірына Шаўчук з Беларусбанка. У мужчын лёс першага месца таксама вызначаўся пасля паўторнага заходу на “агнявую” пазіцыю. Тут фартуна была на баку аўтара гэтых радкоў, які дзякуючы гарачай падтрымцы калег-журналістаў проста не мог не апраўдаць іх спадзяванняў. Другое месца засталося за Віталем Бенешам з Беларусбанка, а трэцяе – за Станіславам Захарыкам з аддзела дэпартамента “Ахова”. Камандны залік у гэтым відзе праграмы выглядаў наступным чынам: I месца – у СПЛ, II – у Беларусбанка, III – у Капыльскага РБУ.
Выніковыя месцы ў пратаколе павінна была вырашыць камбінаваная эстафета. Каманда дэпартамента “Ахова” ў складзе Уладзіміра Анішчанкі, Таццяны Маліноўскай, Яўгена Карзея, Аляксандра Катушонка і Кацярыны Лазарэвіч бездакорна выступіла на ўсіх этапах вясёлага, дзесьці забаўляльнага і відовішчнага выпрабавання. Яны прынеслі сваёй дружыне яшчэ адно першае месца. Усяго чатыры секунды прайгралі пераможцам камунальнікі, якія сталі тут другімі. Трэцюю прыступку п’едэстала гонару занялі супрацоўнікі Беларусбанка.
[caption id="attachment_6462" align="aligncenter" width="443" caption="Старт у лыжнай гонцы ўзяў Д. Гурбан"]
[/caption]
Праграму спаборніцтваў завяршаў сілавы від – гіравы спорт. У спартыўнай зале фізкультурна-аздараўленчага комплексу сабраліся ўсе ўдзельнікі зімовага першынства, каб падтрымаць сваіх асілкаў. У вазе звыш 80 кг абсалютным пераможцам стаў Аляксандр Руды з ЖКГ, які адной рукой выканаў 52 пад’ёмы. Другое месца заняў Віталь Чаркоўскі з раённых электрасетак (37), а трэцяе – Канстанцін Ткачук з вузла паштовай сувязі (33). Андрэй Давідовіч, які прадстаўляў ЦРБ, святкаваў перамогу ў вазе да 80 кг (47). Прадстаўнік аддзела па надзвычайных сітуацыях Аляксей Дзямчук паказаў другі вынік (41). Трэцім у гэтай вазе стаў дырэктар РБУ Віталь Ластачкін (32).
Тым часам судзейская калегія падвяла вынікі зімовай спартакіяды арганізацый, прадпрыемстваў і ўстаноў горада. Першымі чэмпіёнамі спаборніцтваў стала каманда Беларусбанка. Другое месца – у аддзела дэпартамента “Ахова”, трэцяе – у работнікаў жыллёва-камунальнай гаспадаркі.
Усе ўдзельнікі без выключэння атрымалі зарад станоўчых эмоцый і жыццёвай энергіі, бо нішто так не аб’ядноўвае людзей, як спорт. Былі нават прапановы праводзіць падобныя спаборніцтвы часцей. Як кажуць, пажывём – пабачым!
Сяргей ЛАЗОЎСКІ
Фота Сяргея ЛАЗОЎСКАГА і Маргарыты САКОВІЧ 
Пладовыя сады на Капыльшчыне маюць амаль усе гаспадаркі, аднак пераважная большасць іх была пасаджана ў 60-70-я гады мінулага стагоддзя і не пладаносіць. Таму прынята рашэнне на працягу бягучага года выкарчаваць 107 га садоў нізкага банітэту (толькі за студзень-сакавік — 20 га). Далі справаздачу аб тым, што такія работы вядуць ужо тры гаспадаркі — МАУП “Доктаравічы”, СГФ “Крыніца” і ф-л “Лакнея”. Як расказаў намеснік начальніка ўпраўлення райсельгасхарчу па раслінаводстве Віктар Лагодзіч, пасля таго, як вызваленыя плошчы будуць прыведзены ў парадак, яны ўступяць у севазварот, а дровы папоўняць паліўны запас не толькі гаспадарак, але і вяскоўцаў.
Аднак трэба думаць і пра новыя сады. ААТ “Старыца-Агра” і СГФ “Крыніца” актыўна займаліся рэалізацыяй праграмы “Пладаводства”, якая была разлічана на 2004-2010 гады. За гэты час у першай з названых гаспадарак быў пасаджаны 41 га маладых пладовых дрэўцаў і кустоў (38 га яблыні, 1 га грушы і 2 га парэчак). За час дзеяння праграмы ў СГФ “Крыніца” пасаджана 47 га маладых пладовых насаджэнняў.
Маргарыта САКОВІЧ
Вас выслухае начальнік аддзела адукацыі Капыльскага райвыканкама Аляксей Леанідавіч АБРОСІМАЎ.
Калі ў вас ёсць пытанні па арганізацыі адукацыйнага працэсу, тэлефануйце ў пятніцу, 4 лютага, з 10 да 12 гадзін па нумары 5-05-87. 
Інспекцыя Міністэрства па падатках і зборах Рэспублікі Беларусь па Капыльскім раёне па выніках работы за 2010 год заняла трэцяе месца ў конкурсе сярод падатковых інспекцый вобласці другой групы. Днямі начальнік інспекцыі МПЗ па Мінскай вобласці Уладзімір Бурш уручыў калектыву Ганаровую грамату за паспяховую працу.
Сяргей КОЗЕЛ 
