Наталя Аляксандраўна Почапень, якая пражывае па вуліцы Камсамольскай , 87 у Капылі, патэлефанавала ў рэдакцыю з просьбай дапамагчы вырашыць праблему з пешаходным мастком, па якім ісці вельмі рызыкоўна, бо што ні крок, то дзірка. Матэрыял “Няпростая дарога напрасткі” (змешчаны ў газеце за 12 чэрвеня) быў накіраваны на рэагаванне ў КУП “Капыльская ЖКГ”.
У сваім адказе рэдакцыі камунальнікі паведамілі, што частковы рамонт і замена гнілых дошак насцілу пешаходнага мастка выкананы (праверана: падлаталі), а вось капітальны рамонт і замена ўсяго насцілу будуць праведзены пасля нарыхтоўкі драўніны і вырабу патрэбнай колькасці піламатэрыялаў да канца трэцяга квартала 2010 года. Ну што ж, абяцанага, як кажуць, тры гады чакаюць, а тут усяго тры месяцы прапануюць. Пачакаем?
Таццяна РАІЦКАЯ
Уборка збожжавых і зернебабовых для сельскіх працаўнікоў – найважнейшая кампанія, яе стараюцца арганізаваць і правесці як мага хутчэй, каб менш пашкодзіла ўраджай неспрыяльнае надвор’е. Механізатары павінны максімальна выкарыстоўваць кожную пагодлівую гадзіну, таму ім няма часу ехаць дадому на абед, а падсілкавацца, каб працаваць прадукцыйна, трэба, як трэба пасля працоўнага дня прыняць душ, каб зняць стому.
Як арганізавана інфармацыйнае забеспячэнне насельніцтва, харчаванне і памыўка механізатараў на ўборачных работах, высвятлілі начальнік аддзела ідэалагічнай работы райвыканкама Людміла Камкова, галоўны дзяржаўны санітарны ўрач раёна Аляксей Кароль і загадчыца аддзела пісьмаў “СП” Любоў Пятрова.
Першая гаспадарка, куды мы завіталі, СВК “Скабін”. На мехдвары, у асобным памяшканні знаходзіцца душавая. Памыцца тут можна, але прылягаючая тэрыторыя просіць добраўпарадкавання: абкошвання, складзіравання нарыхтаваных дроў. Загадчык майстэрні Віктар Таткоў запэўніў, што ўсё прывядуць у парадак. Сталовай у гаспадарцы няма, а толькі харчаблок, таму прыгатаваннем абедаў для ўдзельнікаў уборачнай будзе займацца гарадское кафэ “Беларусачка”, а падвоз у поле забяспечыць гаспадарка.
Сталовая філіяла “Лакнея” да ўборачных работ падрыхтавана спаўна: утульная зала, парадак на кухні стваралі добры настрой. Кормяць тут штодзённа больш за 20 чалавек, яшчэ ў полі 20. Адказная за арганізацыю харчавання Тамара Лагун запэўніла, што ўсё пад кантролем.
Што тычыць стварэння ўмоў для памыўкі механізатараў, то пытанне застаецца адкрытым. Зараз тут актыўна ідуць работы па будаўніцтве лазні, але час прыспешвае. Ці паспеюць яе пабудаваць?
Таксама кіпяць аддзелачныя работы на будаўніцтве душавых (для мужчын і жанчын) у ААТ “П-з “Дусаеўшчына”. Як адзначыў дырэктар гаспадаркі Сяргей Кавалеўскі, абсталяваць лазню – справа яго гонару. Сталовая гаспадаркі гатуе стравы штодзённа, працуе па графіку, прэтэнзій няма.
Добрае ўражанне склалася ад наведвання мехдвара, дзе штодзённа працуюць душавыя, і сталовай СВК “Ванелевічы”. Яшчэ перад пачаткам пасяўной кампаніі ў сталовай быў праведзены касметычны рамонт, праверана, адрамантавана абсталяванне. Сёння там абеды гатуюць на 77 чалавек і падвозяць у поле.
Дом механізатара і сталовая ў аг. Быстрыца СВК “Ціміразеўскі” таксама заслугоўваюць добрай адзнакі: у душавых чыста, пастаянна ёсць гарачая вада. У сталовай хоць і ідзе рамонт, гэта не перашкаджае Любові Шахлевіч — повару з 29-гадовым стажам — гатаваць смачную страву на 70 чалавек.
Немагчыма не адзначыць старанных працаўніц сталовай в. Чырвоная Дубрава. Шэф-повар Валянціна Чэраховіч вельмі задаволена ўмовамі працы: спраўна робіць халадзільнае абсталяванне, заменена ўся сантэхніка, удосталь посуду і г. д. А калі ёсць умовы, то і працаваць хочацца ад душы: каларыйную, смачную страву на 70 чалавек ёй штодзённа прыгатаваць толькі ў радасць.
Што тычыць лазні ў ВСК “Семежава”, то аднавіць яе проста неабходна. Памыцца там можна, умовы для гэтага ёсць, але лазні “па-чорнаму”, мяркую, беларусу не зусім па душы.
Не удалося пазнаёміцца са станам сталоўкі ЗАТ “Жыліхава”, бо на дзвярах памяшкання ў 12.30 па мясцовым часе вісеў замок. Ганна Іванаўна Ільючыц, адказная за арганізацыю харчавання механізатараў, толькі развяла рукамі, маўляў, што я зраблю: повар страву прыгатавала, адправіла ў поле і пайшла па сваіх справах. Рэйдавай брыгадзе засталося “палюбавацца” на неабкошаную тэрыторыю каля будынка, канстатаваць факт безадказных адносін работнікаў сталовай да сваіх абавязкаў і рушыць далей па маршруце.
У сталовай аграгарадка Цімкавічы, дзе гатуюць 39 абедаў толькі для механізатараў СГФ “Руднае”, працаваў буфет. Агульнае ўражанне склалася неблагое, але рамонт памяшкання ўжо неабходны.
Сталовую СГФ “Грозава” наведалі разам з інжынерам па ахове працы Людмілай Ліннік, якая запэўніла, што ўмовы для харчавання механізатараў у полі створаны. Сапраўды, повар і раздатчыца падрыхтаваліся да справы: ёсць посуд, кантэйнеры, гарачая вада, спраўна працуюць халадзільнікі. Плануюць карміць тут да 70 чалавек.
СВК “Каменскі” абеды для сваіх механізатараў будзе прывозіць з Шышчыц. Усе пытанні вырашаны, заключаны дагавор. На мехдвары гаспадаркі ідуць апошнія прыгатаванні. Механізатары маюць магчымасць памыцца пасля працоўнага дня ў душавой на тэрыторыі мехдвара. Толькі неабходна абкасіць гэту тэрыторыю, каб не заблытацца ў траве на падыходзе да лазні.
Падводзячы вынікі выязной праверкі, адзначу, што выяўленыя негатыўныя факты адзінкавыя. Спадзяёмся, у сельгаспрадпрыемствах прымуць меры, каб гэтыя недахопы былі выпраўлены. Пазітыўна тое, што ва ўсіх гаспадарках на належным узроўні аформлены інфармацыйныя стэнды, у гэтым заслуга намеснікаў кіраўнікоў па ідэалагічнай рабоце. Да таго ж, усе механізатары забяспечаны спецадзеннем.
Ёсць упэўненасць, што ўборачныя работы ў раёне пройдуць паспяхова.
Любоў ПЯТРОВА
Хлебаробы СВК “Мажа-Агра” аднымі з першых на Капыльшчыне распачалі ўборку азімага рапсу. У брыгадзе “Вусава” на КЗС-1218 працуе Аляксандр Улашчык.
Дастаткова аднаго камбайна, каб справіцца з уборкай гэтай культуры, таму што з 200 гектараў пасля зімоўкі “выжыла” толькі 27. Але і над імі давялося папрацаваць. Спачатку падкармілі азотнымі ўгнаеннямі, пасля папоўнілі недахоп бору, а таксама ўнеслі аміячную салетру, мікраэлементы. Дзейнічалі згодна з рэкамендацыямі вучоных, якія даследавалі стан рапсу на тэрыторыі нашага раёна. Шкада, што не ўдалося ўратаваць усе пасевы. Плошчы з загінуўшымі раслінамі давялося перасеяць ячменем.
Наогул, як сцвярджае кіраўнік гаспадаркі Мікалай Гурыновіч, сёлета яравыя культуры ўзялі верх над азімымі, і плануецца па ўраджайнасці іх значнае пераўзыходжанне. Праўда, ліўні і моцныя вятры палажылі не адзін дзесятак гектараў пасеваў. Адным словам, уборка 1662 гектараў збожжавага кліну будзе зусім няпростай. На гэта настроены і экіпажы ўсіх шасці камбайнаў, якія ў дзень нашага прыезду яшчэ раз аглядвалі свае машыны, звяртаючы асаблівую ўвагу на ўшчыльнікі і сцеблапад’ёмнікі. Страт не павінна быць – гэта галоўная задача на ўборачную кампанію.
Месцазнаходжанне СВК “Мажа-Агра” паблізу Капыля стварае дадатковыя кадравыя праблемы. Але падчас жніва і гэта пытанне вырашана станоўча. У складзе некаторых камбайнавых экіпажаў, звенняў па дапрацоўцы збожжа – прадстаўнікі Капыльскага СПЛ, жыллёва-камунальнай гаспадаркі, арганізацый горада. Па ініцыятыве РК ГА “БРСМ” на зернетаку будзе працаваць маладзёжны атрад.
Па словах Мікалая Гурыновіча, сёлета на жніве мяркуюць задзейнічаць значна больш людзей, чым летась. Гэты факт прымусіў адмовіцца ад дастаўкі абедаў з Капыля, а арганізаваць кармленне ўдзельнікаў уборачнай кампаніі ўласнымі сіламі. Прыведзена ў парадак сталовая, вырашана пытанне з кадрамі, на развозку абедаў і падвячоркаў выдзелена два аўтамабілі, на мехдвары праведзена рэканструкцыя душавой. Адным словам, клопат пра чалавека павінен кампенсаваць тыя цяжкасці, з якімі давядзецца сустрэцца падчас масавай уборкі. Вельмі ж непрадказальная сёлета нябесная канцылярыя.
Марыя ШЭІНА
НА ЗДЫМКУ: камбайнер А. М. Улашчык і кіраўнік сельгасучастка №1 В. А. Чаркас на ўборцы рапсу.
Фота аўтара
«Прямая линия» председателя Минского облисполкома Бориса Васильевича Батуры с жителями
Минской области состоится 23 июля 2010 года.
УВАЖАЕМЫЕ ЖИТЕЛИ МИНЩИНЫ!
Свои вопросы по всем проблемам, которые вас волнуют и тревожат, — качеству строительства жилья, благоустройству дворов и населенных пунктов, работе организаций жилищно-коммунального хозяйства, поликлиник, магазинов, учреждений образования, культуры и т.д. — вы сможете задать председателю Мин- ского облисполкома Борису Васильевичу Батуре 23 июля 2010 года в ходе прямой линии.
В работе прямой линии принимают участие помощник Президента Республики Беларусь - главный инспектор по Минской области Николай Михайлович Иванченко, председатель Палаты представителей Национального собрания Республики Беларусь, уполномоченный по Минской области Владимир Павлович Андрейченко, Государственный секретарь Совета безопасности Республики Беларусь, уполномоченный по Минской области, Леонид Семенович Мальцев, а также руководители структурных подразделений и служб облисполкома.
На прямой линии будет работать многоканальный телефон 8-(017) 500- 41-60. Свои вопросы можно будет задать с 10.00 до 12.00.
Все звонки будут принимать и записывать операторы. Ни один звонок не останется без внимания и ответа, даже если председатель облисполкома лично не успеет пообщаться по телефону с гражданином. На все поступившие на прямую линию обращения будут даны ответы.
Становіцца добрай традыцыяй падчас летніх канікул у клубных установах раёна ладзіць агляды на лепшую пастаноўку культурна-масавых мерапрыемстваў для дзяцей. Што ж адметнага прапанавалі хлопчыкам і дзяўчынкам клубнікі сёлета? Пра гэта расказвае загадчыца аддзела культурна-масавай работы РЦК Любоў ГАЛУБОВІЧ.
— Было падрыхтавана да агляду сем конкурсных праграм, якія праходзілі як на закрытых пляцоўках, так і на адкрытых. У гэтым годзе агляд распачалі работнікі Скабінскага СДК і Дзяржынскага СК святам “Ёжкін лес”. Казачныя героі прапаноўвалі ўдзельнікам мерапрыемства розныя гульні і забавы. Усё тэатралізаванае дзейства закончылася вясёлай дыскатэкай.
Не менш цікавай была сумесная праграма, падрыхтаваная рэжысёрска-пастановачнай групай у складзе работнікаў Песачанскага СДК, Лоцвінскага СДК і Сл.-Кучынскага СК. Тут можна было пагуляць па кірмашы, паглядзець на розныя дзівосы. Чаго толькі не прапаноўвалі клубныя работнікі сваім маленькім гасцям: агародніну і салодкае, забавы на ўсе густы. У кожнай гандляркі можна было выйграць кірмашовую валюту — “тыгрыкі”, а потым яе абмяняць на прыз.
Адметным стала выступленне работнікаў Пацейкаўскага, Душаўскага і Лясноўскага сельскіх Дамоў культуры з праграмай “Как здорово, что все мы здесь…”. Адрознівалася яна ў першую чаргу сваёй масавасцю, добрай ігрой вядучых і тым, што ў ролі “дзяцей” выступалі… настаўнікі.
Згодна з paшэннем журы менавіта праграма “Как здорово, что все мы здесь…” прызнана лепшай у намінацыі “за рэжысёрскае і мастацкае вырашэнне”. За арыгінальнасць сцэнічнага матэрыялу была адзначана праграма “Запрашаем на кірмаш”. Але самую лепшую адзнаку мерапрыемствам выставілі дзеці. Яны актыўна ўдзельнічалі ва ўсіх конкурсах і цікавіліся: "Калі ж будзе наступнае свята?"
Запісала Маргарыта САКОВІЧ
