З 1 чэрвеня пачалі працаваць 23 летнія лагеры адпачынку розных напрамкаў дзейнасці.
На працягу першага месяца лета тут адпачнуць 843 дзіцяці. У лагеры за межы раёна, каб атрымаць добрыя ўражанні і летні настрой, адправіліся 50 хлопчыкаў і дзяўчынак.
Дзіяна ТКАЧЭНКА 
У рамках рэспубліканскай акцыі «Канікулы без дыму і агню», якая будзе праходзіць на працягу лета на аздараўленчых пляцоўках і ў лагерах, супрацоўнікі Капыльскага РАНС распрацавалі план прафілактычных мерапрыемстваў па прадухіленні пажараў з удзелам дзяцей.
Так, падчас сустрэч з хлопчыкамі і дзяўчынкамі ў СШ №2 г. Капыля пажарныя правялі дэманстрацыю аварыйна-выратавальнай тэхнікі і абсталявання, расказалі пра асновы бяспекі жыццядзейнасці.
Сяргей ЛАЗОЎСКІ 
На абласной спартакіядзе навучэнскай моладзі па кросе, што праходзіла ў вёсцы Падлессе Пухавіцкага раёна, капыльская каманда стала трэцяй сярод 22 раёнаў Міншчыны.
У склад зборнай уваходзілі 8 чалавек (чатыры юнакі і чатыры дзяўчыны), якія паказалі добрыя вынікі на адпаведных раённых спаборніцтвах. У асабістым заліку добрую індывідуальную падрыхтоўку паказалі Руслан Гарнастай (I месца на дыстанцыі 2 км) і Марына Міхайлоўская (III месца на дыстанцыі 1 км).
Сяргей ЛАЗОЎСКІ ![kor[1]](http://www.kopyl.by/wp-content/uploads/2015/06/kor1.jpg)
Корманарыхтоўчая кампанія — на дадзены момант самае актуальнае пытанне для аграрыяў. Менавіта яму была прысвечана чарговая нарада ў Капыльскім райвыканкаме.
Адказны ад вобласці, намеснік дырэктара Мінскай абласной ветэрынарнай лабараторыі Сяргей Бобрык гаварыў пра захаванне асноўных тэхналагічных патрабаванняў. Як адзначыў спецыяліст, нельга пачынаць закладку траншэі, калі не накошана 80% зялёнай масы ад ёмістасці траншэі, трэба, каб вышыня масы, што трамбуецца, кожныя суткі была не менш за 0,9 метра, закладка масы павінна праводзіцца на ўсю даўжыню траншэі. Аптымальная вільготнасць масы павінна складаць 45%, тэмпература — не перавышаць 37 градусаў. Вага тэхнікі, якая трамбуе, павінна быць не ніжэй за 12-14 тон, трамбоўка трактарамі са спаранымі коламі забаронена. Таксама катэгарычна забараняецца пры ўкрыцці траншэі выкарыстоўваць другасную поліэтыленавую плёнку. Яшчэ адзін важны момант: унясенне кансерванта павінна быць у рэжучы апарат корманарыхтоўчай тэхнікі. За незахаванне гэтых патрабаванняў асабістую адказнасць нясе кіраўнік сельгас-прадпрыемства.
На тэхналагічных працэсах корманарыхтоўкі, у прыватнасці на нарыхтоўцы сенажу ў палімерную плёнку, а таксама на неабходнасці падкошвання пашаў спыніліся ў сваіх выступленнях старшыня Капыльскага райвыканкама Анатоль Жданеня і яго першы намеснік начальнік упраўлення сельскай гаспадаркі і харчавання Анатоль Ладыга.
— Мы павінны добра разумець сітуацыю, — звяртаючыся да аграрыяў раёна, адзначыў Анатоль Жданеня. — Калі мы не нарыхтуем якасных кармоў, то не будзе добрых вынікаў і ў жывёлагадоўчай галіне. Таму да гэтай кампаніі трэба аднесціся вельмі адказна.
Сяргей КОЗЕЛ 
Выязная прэс-канферэнцыя старшыні Мінскага аблвыканкама Сямёна Шапіры для рэспубліканскіх і рэгіянальных сродкаў масавай інфармацыі адбудзецца 12 чэрвеня на базе арганізацый Крупскага раёна.
У рамках прэс-канферэнцыі ўдзельнікі, у тым ліку і прадстаўнікі «Слава працы», наведаюць прадпрыемства па перапрацоўцы аўтамабільных і індустрыяльных масел ТАА «ДВЧ-менеджмент», прыватную базу адпачынку «Сялява-тур», цэх мясаперапрацоўкі ААТ «Кляновічы».
Марыя ШЭІНА 
