На момант нашага візіту быў засеяны 33-гектарны палетак каля Дзярэчына і вяліся работы на 240 гектарах паблізу Бучаціна. Пасяўная праходзіць па штатным графіку: рыхтуюць глебу, уносяць мінеральныя ўгнаенні і непасрэдна вядуць сяўбу. Завяршыць яе плануюць да 25 жніўня.
Такія важныя работы даверылі вопытным механізатарам Івану Корзуну і Мікалаю Лапотку. Першы з іх, параўняўшыся з намі, літаральна на некалькі хвілін пакінуў свайго «Беларуса». За гэты час паспелі крыху пагутарыць. У сельскай гаспадарцы Іван Мікалаевіч працуе больш за чвэрць стагоддзя. Да сялянскіх будняў яму не прывыкаць. Любая справа, за якую ні возьмецца, спорыцца ў яго руках. Сее ён сумленна – радкі нібы пад лінейку.
– Інакш і нельга! – усміхаецца механізатар. – Які зачын пад будучы ўраджай зробіш, такія ўсходы і атрымаеш. Калі калегі будуць хлеб убіраць, хочацца, каб мяне добрым словам успаміналі.
Дарэчы, летась ураджайнасць рапсу на ціміразеўскіх палетках склала 32,8 цэнтнера з гектара, што прыкметна вышэй за паказчыкі папярэдніх гадоў. Сярэдняя ўраджайнасць сёлета трымаецца на ўзроўні прыкладна 40 цэнтнераў з гектара, што для гэтага сезона лічыцца добрым вынікам.
Комментарии