Прэзідэнт Беларусі Аляксандр Лукашэнка назваў факты падзяжу жывёлы ў жывёлагадоўлі маральнай выродлівасцю. Пра гэта ён заявіў на нарадзе па асобных пытаннях сацыяльна-эканамічнага развіцця Віцебскай вобласці. «Чаму я кажу пра падзёж? Гэта ж маральная выродлівасць, калі мы не можам абараніць, асабліва ў гэтае цяжкае надвор’е, братоў сваіх меншых. Як можна не абараніць кацяня, парася, цяля, сабачку?!» – сказаў Кіраўнік дзяржавы.
З надыходам халадоў работнікам жывёлагадоўчай галіны Капыльшчыны прыйшлося перагледзець сістэму арганізацыі ўтрымання жывёлы на фермах і прыняць дадатковыя меры па забеспячэнні захаванасці маладняку.
Ужо з моманту, калі сіноптыкі паведамілі пра набліжэнне халадоў, у Мінаблвыканкаме заклікалі кіраўнікоў раённых адміністрацый і профільных упраўленняў, а таксама работнікаў сельскагаспадарчых прадпрыемстваў правесці шэраг мерапрыемстваў, накіраваных на ўцяпленне памяшканняў для буйной рагатай жывёлы, надаўшы асаблівую ўвагу маладняку. У сваю чаргу ў Капыльскім раёне праведзены арганізацыйныя нарады пад кіраўніцтвам старшыні райвыканкама Сяргея Пілішчыка, дзе было абмеркавана кола першачарговых задач, неабходных для выканання задання па ўцяпленні жывёлагадоўчых аб’ектаў.
У гэтыя марозныя дні ў гаспадарках раёна надаецца асабліва пільная ўвага выкананню патрабаванняў па ўтрыманні, кармленні і паенні жывёлы. На малочна-таварным комплексе «Камень» ААТ «Праснакі» аператыўна прынялі меры па змя-ненні ўмоў утрымання цялят пры мінусавай тэмпературы. Намеснік дырэктара па жывёлагадоўлі Ігар Маркевіч падрабязна расказаў і паказаў, як забяспечваецца камфорт і здароўе жывёлы ва ўмовах значнага паніжэння тэмпературы.
На комплексе размяшчаецца 1695 галоў жывёлы, з якіх 755 – дойныя каровы, а астатнія – маладняк. Ігар Іванавіч падкрэсліў, што падрыхтоўка да зімоўкі была пачата летам. Разам з тым, разумеючы, што ідуць моцныя маразы, у гаспадарцы былі арганізаваны дадатковыя меры па ўцяпленні памяшканняў, у якіх утрымліваецца жывёла.
– Зачыняем дзверы, закладаем усе шчыліны і вентыляцыйныя шахты сенам і саломай, каб не было скразнякоў, для дадатковага ацяплення ўсталявалі электраабагравальнікі, закупілі электраканвектары, для маленькага пагалоўя – спецыяльныя камбінезоны, – растлумачыў Ігар Маркевіч.
Цяляты на комплексе ўтрымліваюцца ў прафілакторыях. Жывёла падзелена па ўзроставых групах, што дазваляе рацыянальна, якасна і ў адпаведнасці з тэхналагічнымі ўмовамі ажыццяўляць яе догляд і кармленне. Жывёлавод Вера Чарняхоўская працуе на гэтым участку паўтара года, да гэтага 25 гадоў даіла кароў. На яе памяці з такімі суровымі зімовымі ўмовамі сутыкацца даводзілася вельмі рэдка. А таму меры, прынятыя для ўцяплення памяшканняў, лічыць правільнымі, своечасовымі і зручнымі для цялят.
Галоўнай умовай, паводле слоў жанчыны, з’яўляецца своечасовая замена саламянай падсцілкі на сухую і свежую, а таксама паўнацэнны рацыён.
– Кармлю маладняк па гадзінах, – расказвае жывёлавод. – Прыбаўкі ў вазе ў межах нормы, што гаворыць пра тое, што цяляты здаровыя і развіваюцца правільна.
Па словах намесніка дырэктара сельгаспрадпрыемства Ігара Маркевіча, для папаўнення энергіі ў халодны перыяд рацыён жывёлы быў прапарцыянальна павялічаны:
– Пры паенні мы сталі даваць цялятам больш малака, старэйшаму маладняку і каровам павялічылі порцыю камбікорму. Усё разам, на наш погляд, дапамагае захоўваць здароўе жывёлы, а таксама практычна без вытворчых страт забяспечваць дзейнасць комплексу. Што да аб’ёмаў кармоў, у гаспадарцы недахопу няма. Запасаў хопіць, каб спакойна прайсці гэты зімова-стойлавы перыяд.
У такі няпросты час за работай жывёлагадоўчых комплексаў і ўмовамі ўтрымання жывёлы ўстаноўлены пастаянны шматузроўневы кантроль, пачынаючы з профільных службаў вобласці, раёна і заканчваючы спецыялістамі сельгаспрадпрыемстваў. Напрыклад, у час нашага візіту ў ААТ «Праснакі» арганізацыю работы МТК «Камень» ацаніў галоўны ветэрынарны ўрач раёна Пётр Сясіцкі. Ён падкрэсліў, што калектыў комплексу і ўсяго сельгаспрадпрыемства адказна паставіўся да выканання задачы па рабоце ва ўмовах паніжаных тэмператур.
– Надаўшы павышаную ўвагу ўцяпленню памяшканняў з БРЖ, асабліва тых, у якіх утрымліваецца маладняк, жывёлаводы тым самым аказалі істотны ўплыў на захаванне статка здаровым і працаздольным, а значыць забяспечылі ў перспектыве стабільную і эфектыўную работу свайго сельгаспрадпрыемства.
Факт
Паводле інфармацыі ўпраўлення па сельскай гаспадарцы і харчаванні райвыканкама, з пачатку 2026 года ў гаспадарках раёна прывагі буйной рагатай жывёлы склалі 9842 ц (97,8% да папярэдняга года). Сярэднясутачныя прывагі знаходзяцца на ўзроўні 673 г (у 2025 годзе – 662 г). Найбольш – 805 г – атрымліваюць у філіяле «Лакнея». Добрыя паказчыкі таксама ў ААТ «Праснакі» (773 г), ААТ «Капыльскае» (756 г), ЗАТ «Жыліхава» (720 г).Найбольшая прыбаўка – 110 г – назіраецца ў ААТ «Семежава», крыху адстаюць жывёлаводы філіяла «Лакнея» (84 г) і ААТ «Скабін» (72 г).
Комментарии