У такім бесперабойным рытме наладжаны канвеер работ у філіяле «Лакнея». Як расказаў намеснік дырэктара па раслінаводстве сельгасарганізацыі Аляксандр Пілецкі, на ўсіх участках рабочы працэс належна арганізаваны, кожны на сваім месцы працуе адказна.
У народзе кажуць: што пасееш, тое і пажнеш. Таму ў гаспадарцы вялікую ўвагу надаюць усім неабходным перадпасяўным агратэхнічным аперацыям, пачынаючы ад ворыва і заканчваючы ўнясеннем неабходных мінеральных угнаенняў. Па вялікім рахунку, толькі пры выкананні тэхналогіі і адказным стаўленні да справы можна разлічваць на станоўчы вынік і добры ўраджай. А ён сёлета парадаваў хлебаробаў гэтай гаспадаркі: з агульнараённага каравая ў больш чым 165 тысяч тон звыш 13 тысяч 300 тон збожжавых належаць лакнееўскім аграрыям, пры сярэдняй ураджайнасці 57,9 цэнтнера з гектара.
Дарэчы, у філіяле найлепш сярод сельгаспрадпрыемстваў Капыльшчыны ўрадзіў азімы рапс: на круг камбайнеры намалочвалі 45,9 цэнтнера з гектара (другі паказчык у турнірнай табліцы) пры сярэднераённым 37,4 і з 461 гектара намалацілі звыш 2100 тон. Робяць стаўку на алейную культуру і на наступны год. Яе плошчы будуць павялічаны да 900 гектараў.
– Азімы рапс – адна з самых тэхналагічных і прадукцыйных культур. Аднак пры гэтым важна памятаць, што на годны ўраджай можна разлічваць толькі пры ўмове яе добрай перазімоўкі, якая ў першую чаргу залежыць ад строгага захавання тэхналогіі сяўбы і апрацоўкі, – падкрэсліў Аляксандр Пілецкі. – Што да тэрмінаў сяўбы, то для гэтай культуры яны маюць вырашальнае значэнне для забеспячэння надзейнай перазімоўкі раслін і атрымання добрага ўраджаю. Мы неаднаразова заўважалі, што рапс, пасеяны да першага верасня, паспявае да замаразкаў набыць аптымальныя памеры і сфарміраваць неабходную каранёвую сістэму.
У філіяле «Лакнея» весці ворыва глебы і падрыхтоўку яе да сяўбы прыступілі адразу пасля вызвалення палёў ад збажыны і саломы. А каб у наступным годзе аддача хлебнай нівы была высокай, імкнуцца не марудзіць з сяўбой азімых культур. Пад яе неабходна ўзараць 1025 гектараў глебы, фактычна гэта ўжо зроблена больш чым на 1000 гектараў. Пад будучую сяўбу якасна рыхтуецца глеба. Каб ураджай быў больш багатым, уносяцца на палеткі мінеральныя ўгнаенні.
Гэты год выдаўся спрыяльным для корманарыхтоўкі. На адну ўмоўную галаву ў філіяле «Лакнея» ўжо назапашана 12,8 цэнтнера кармавых адзінак. Для параўнання, летась на гэты перыяд было амаль столькі ж. План па нарыхтоўцы сенажу выконваюць амаль усе гаспадаркі раёна, пасля тройкі лідараў – філіял «Лакнея», дзе ў траншэі закладзена звыш 5700 тон гэтага віду корму, што складае 49% ад запланаванага.
Гэтымі днямі ў гаспадарцы ўжо вядуць чацвёрты ўкос траў. У дзень нашага наведвання касіў люцэрну добра вядомы нашым чытачам механізатар Аляксандр Карпучок, які адразу ж пасля жніва, падчас якога ў экіпажы з Юрыем Давідоўскім намалаціў звыш дзвюх тысяч тон, перайшоў на іншы камбайн, але ўжо кормаўборачны.
– У сельскай гаспадарцы няма калі адпачываць, – падкрэсліў механізатар. – Збажыной мы гаспадарку забяспечылі, а вось цяпер прадоўжым ствараць запас кармоў, каб паспяхова перазімаваць.
Фота аўтара
Комментарии