На IV абласной спартакіядзе работнікаў аграпрамысловага комплексу, якая прайшла з 23 па 25 верасня ў Ждановічах, прадстаўнікі каманды Капыльскага раёна дабіліся пэўных поспехаў.
Так, вадзіцель СВК “Ціміразеўскі” Андрэй Чэрнік у вагавой катэгорыі да 80 кілаграмаў падняў гіру 146 разоў і ў дадзеным відзе спорту заняў першае месца ў вобласці. У спаборніцтвах па мнагаборстве дырэктар ДЮСШ РК прафсаюза работнікаў АПК Дзмітрый Була паказаў другі вынік. А ўвогуле каманда капыльскіх аграрыяў у спаборніцтвах па мнагаборстве “Здароўе” заняла ганаровае ІІІ месца, адзначана спецыяльным Дыпломам.
Андрэй Чэрнік і Дзмітрый Була запрошаны прыняць удзел у абласной спартакіядзе работнікаў галіновых прафсаюзаў, якая пройдзе 8—10 кастрычніка ў Капылі.
Марыя ШЭІНА
Адбыўся адкрыты конкурс па продажы юрыдычным асобам прадпрыемства як маёмаснага комплексу, на ўмовах, вызначаных Указам Прэзідэнта Рэспублікі Беларусь №113 ад 25 лютага 2008 года “Аб парадку і ўмовах продажу юрыдычным асобам прадпрыемстваў як маёмасных комплексаў стратных дзяржаўных аргізацый”.
На таргі было выстаўлена камунальнае вытворчае прадпрыемства “Капыльскі завод драўвырабаў”. Як паведамілі ў аддзеле эканомікі райвыканкама, конкурс адбыўся. Перамагло СТАА “Капыльская вытворчасць будаўнічых сістэм”, якое прапанавала інвестыцыйны праект па развіцці свайго прадпрыемства ў частцы выкарыстання выстаўленага на таргі аб’екта, прадугледзела сацыяльныя праграмы па падтрымцы рабочага калектыву, стварэнне новых працоўных месцаў і захаванне тых, што існуюць, на перыяд пагашэння запазычанасці прадпрыемства рэканструкцыю і мадэрнізацыю вытворчасці. Акрамя таго, сумеснае таварыства прыняло на сябе ўсе запазычанасці стратнага прадпрыемства.
У чацвер, 30 верасня, з 10 да 12 гадзін адбудзецца прамая лінія з намеснікам старшыні камісіі па справах непаўналетніх райвыканкама Зояй Леанідаўнай ДАЙНЯК.
Калі ў вас ёсць пытанні па праблемах сацыяльнага недабрабыту непаўналетніх, тэлефануйце ў абазначаны час па нумары 54-0-40.
Мноства самых найлепшых уражанняў прывезлі дамоў удзельнікі рэспубліканскага фестывалю-кірмашу “Дажынкі-2010”, які праходзіў у г. Ліда 24-25 верасня.
Сярод запрошаных была і старшыня Слабада-Кучынскага сельвыканкама Нэлі Гусева. Як мы ўжо паведамлялі, менавіта сельскі Савет, які яна ўзначальвае, прызнаны лепшым сярод сельсаветаў Міншчыны ў рэспубліканскім аглядзе-конкурсе “Землекарыстанне высокай культуры земляробства, добраўпарадкаванне машынных двароў, жывёлагадоўчых ферм і комплексаў”. За высокія дасягненні – і добры падарунак: на “Дажынках-2010” сельсавету ўручаны новенькі “Беларус”.
Маргарыта САКОВІЧ
У нашай краіне распачаліся традыцыйныя восеньскія кірмашы. Гандлююць бульбай, агароднінай і садавінай, іншымі неабходнымі таварамі.
З мэтай больш поўнага задавальнення попыту насельніцтва нашага раёна на сельскагаспадарчую прадукцыю, інвентар, насенне і пасадачны матэрыял, на прамысловыя і харчовыя тавары старшыня Капыльскага райвыканкама падпісаў распараджэнне аб правядзенні кірмашоў у Капылі. Прыняць удзел у іх змогуць сельскагаспадарчыя арганізацыі, сялянскія (фермерскія) гаспадаркі, насельніцтва (пры наяўнасці адпаведных дакументаў на прадукцыю), а таксама арганізацыі гандлю, грамадскага харчавання, прамысловасці, бытавога абслугоўвання, майстры народных промыслаў, індывідуальныя прадпрымальнікі.
Кірмашы запланаваны на 2, 9, 16, 23, 30 кастрычніка, 6, 13, 20, 27 лістапада, 25 і 31 снежня.
Традыцыйна яны будуць праходзіць у святочнай атмасферы. Гараджане і госці нашага горада змогуць не толькі зрабіць запасы на будучую зіму, але і атрымаць задавальненне ад цікавай культурнай праграмы.
Маргарыта САКОВІЧ
