Уладзімір Рудакоўскі – ветэран сельскагаспадар чай вытворчасці, заслужаны работнік сельскай гаспадаркі Рэспублікі Беларусь узнагароджаны медалём «За працоўныя заслугі». На працягу многіх гадоў ён узначальваў ААТ «Старыца-Агра», добра вядомае за межамі раёна. Яго імя неаднаразова гучала сярод лепшых кіраўнікоў вобласці, а ў 2018 годзе ён быў прызнаны «Чалавекам года Міншчыны».
– Калі мяне выбралі дэлегатам Першага Усебеларускага народнага сходу ў 1996 годзе, у паветры лунала пачуццё неверагоднай адказнасці, – успамінае Уладзімір Анатольевіч. – Гэта была эпоха выпрабаванняў для ўсёй постсавецкай прасторы. Мы прыязджалі ў Мінск не як чыноўнікі, а як людзі справы: трактарысты, даяркі, інжынеры, дырэктары. Кожны хацеў данесці боль свайго калектыву і свой погляд на тое, як падняць вёску.
Паводле слоў ветэрана працы, атмасфера Палаца Рэспублікі, дзе сабралася 2,5 тысячы самых розных людзей з усіх куткоў Беларусі, стварала ўнікальны эфект яднання.
– На сцэну выходзілі простыя працаўнікі і гаварылі пра надзённае: пра закупачныя цэны на малако, пра запчасткі для камбайнаў, пра дарогі да аддаленых фермаў. І гэтыя словы чулі на самым высокім узроўні. Сход – гэта своеасаблівы барометр грамадства. На ім фарміраваўся эканамічны пульс наступнай пяцігодкі, – дзеліцца ўражаннямі дэлегат.
Шлях развіцця форуму – наглядны прыклад станоўчых змен у краіне. Калі першыя сходы былі прысвечаны выжыванню і базаваму аднаўленню, то пазнейшыя набылі характар планавання росту. Напрыклад, успамінаючы чацвёрты сход, Уладзімір Анатольевіч падкрэслівае састаўную: эмацыянальную.
– На гэтым форуме мы адчулі гонар за Беларусь, за яе поспехі. Мне, як прадстаўніку сельскай гаспадаркі, больш блізкая гэта галіна. Ужо на той час мы сябе забяспечвалі збожжам, мяса-малочнай прадукцыяй. Перайшлі ад філасофіі «як выжыць» да філасофіі «як прадаць». Сельгасарганізацыі ўмацавалі матэрыяльна: пабудавалі аграгарадкі, новыя фермы, збожжа сушыльныя комплексы, добраўпарадкавалі мехдвары, населеныя пункты.
Рудакоўскі падкрэслівае бесперапыннасць дзяржаўнай палітыкі, звязваючы вынікі розных пяцігодак у адну лагічную лінію.
– На ўсіх форумах былі вызначаны правільныя шляхі развіцця нашай краіны, – сцвярджае Уладзімір Анатольевіч. – Планы выконваліся кожныя наступныя пяць гадоў. Без такой паслядоўнасці мы б не мелі той базы, якую маем сёння. Асаблівы водгук у сэрцы дэлегата знаходзіць непасрэдны дыялог з кіраўніком дзяржавы. Ён узгадвае атмасферу важнай палітычнай падзеі, якая панавала ў чэрвені 2016 года ў Мінску падчас V Усе беларускага народнага сходу.
– У кожнага ўдзельніка форуму была магчымасць даведацца пра рэальнае становішча спраў з першых вуснаў – ад самога Прэзідэнта, – гаворыць Уладзімір Анатольевіч. – Гэта не проста справаздача. Гэта размова без пасрэднікаў, дзе можна задаць хвалюючае пытанне і атрымаць шчыры адказ. Такі фармат надае рашэнням сходу сапраўдную легітымнасць у вачах народа.
Комментарии