– Усімі гаспадаркамі яшчэ ў кастрычніку–лістападзе распрацаваны планы-графікі падрыхтоўкі тэхнікі да веснавых палявых работ, – адзначае начальнік аддзела раслінаводства, жывёлагадоўлі і механізацыі ўпраўлення па сельскай гаспадарцы і харчаванні райвыканкама Андрэй Мамчыц. – Вызначаны неабходныя аб’ёмы і тэрміны рамонту, асобныя поўнакамплектныя машыны, а таксама вузлы і агрэгаты здадзены на спецыялізаваныя рамонтныя прадпрыемствы. Таксама распрацаваны графік забеспячэння гатоўнасці тэхнікі да палявых работ па раёне ў цэлым. І ўжо з лістапада мінулага года работам дадзены старт.
З 16 па 27 лютага, згодна з рашэннем райвыканкама, будзе праведзены дзяржаўны тэхнічны агляд трактароў і прычэпаў. Як паведаміў галоўны дзяржаўны інспектар па наглядзе за тэхнічным станам машын і абсталявання ўпраўлення па сельскай гаспадарцы і харчаванні райвыканкама Валерый Прахарэня, па стане на сярэдзіну студзеня тэхніка гатова толькі на 70%, частка яшчэ падлягае абслугоўванню. Безумоўна, адбіваецца тое, што ў гаспадарках не хапае кадраў, бо на гэты момант некаторыя механізатары знахо-дзяцца ў водпусках, некаторыя задзейнічаны на іншых сельгасработах. Уплывае і недахоп грашовых сродкаў.
– У асноўным запасныя часткі маюцца, але ёсць складаныя пазіцыі, асабліва па імпартных трактарах. У трох гаспадарках яны няспраўныя, – падкрэсліў Валерый Прахарэня. – У прыватнасці, у ААТ «Семежава» неабходна адшукаць на рамонт «Джон Дзіра» каля 60 тысяч, трактар прастойвае дзесьці з кастрычніка мінулага года. Але адзначу, што згодна з указам Прэзідэнта Беларусі Аляксандра Лукашэнкі, па лініі лізінгу да пасяўной плануецца набыць 12 энерганасычаных трактароў у гаспадаркі нашага раёна. Значная нагрузка па рамонце ўскладзена на ААТ «Капыльскі райаграсэрвіс». Ёсць сельгаспрадпрыемствы, дзе тэхніка, можна сказаць, састарэла, яе проста не хапае на ўсе плошчы. Напрыклад, у КСУП «Доктаравічы» і ААТ «Ціміразеўскі». Яшчэ адзначу, што да 1 лютага неабходна паставіць на лінейку гатоўнасці агрэгаты «Раса» (іх у раёне 25), таму што яны першымі вый-дуць у поле на падкормку азімых, рапсу, траў і г. д.
Асноўны ж фронт бягучых работ – на плячах інжынерных служб, механізатараў, звар-шчыкаў і слесараў сель-гаспрадпрыемстваў. І таму гэтымі днямі ў майстэрнях па-сапраўднаму горача. У гэтым упэўніліся, калі пабывалі ў некаторых гаспадарках раёна.
Пад’язджаючы да мехдвара СГФ «Руднае», мы пачулі, што праца кіпіць. Зварка, гоман, ляск металу і стук прылад – механізатары завіхаюцца над машынамі і агрэгатамі. Трактарысты-машыністы Яўген Лагавы і Сяргей Волкаў заняты бягучым рамонтам культыватара. Усё – пад пільным кантролем загадчыка майстэрні Уладзіміра Лагішынца.
Дарэчы, у гаспадарцы ў наяўнасці 41 трактар (спраўных 32, або 78%), з якіх шэсць – энерганасычаныя, два буйнагабарытныя пасяўныя агрэгаты, пяць абаротных васьмікорпусных плугоў, два самаходныя ўніверсальныя сродкі «Раса» для ўнясення мінеральных угнаенняў, правядзення падкормак.
– Сёння ўсе старанна працуюць на рамонце тэхнікі, так што да палявых работ будзем поўнасцю гатовы ў вызначаны тэрмін, – падкрэслівае Уладзімір Лагішынец. – Кажуць, што зіма – час адпачынку для вяскоўцаў. Так, у асноўным водпускі ў нас прыпадаюць на гэтую пару, але рамонт тэхнікі ніхто не адмяняў. Часам трэба не проста гайку падкруціць, але і як след руку прыкласці, каб трактар або агрэгат працаваў як гадзіннік. У пасяўную будзе не да рамонтаў.
Адказна, з разуменнем важнасці пастаўленых задач вядуць рамонт работнікі філіяла «Вялікая Раёўка». Па словах дырэктара сельгаспрадпрыемства Сяргея Карсюка, у гаспадарцы няма праблем з тэхнікай. Машынна-трактарны парк тут прадстаўлены шырокай лінейкай сучасных і шматфункцыянальных агрэгатаў. Сяргей Мікалаевіч свой калектыў хваліць і ў выніку падрыхтоўкі не сумняваецца.
– Наша рамонтная майстэрня ўкамплектавана спецыялістамі. Яны – майстры на ўсе рукі і сваю працу ведаюць. Адразу пасля восеньскіх работ прыступілі да рамонту. Закупілі запчасткі і матэрыялы для таго, каб абнавіць сельскагаспадарчую тэхніку. У асноўным праведзены работы па аднаўленні тых агрэгатаў, якія аднымі з першых выйдуць на вясновыя палі. Гэта плугі, культыватары, агрэгаты камбінаваныя шыроказахопныя, пасяўныя агрэгаты, раскідвальнікі мінеральных і арганічных угнаенняў, універсальны энергетычны самаходны сродак «Раса», – падкрэсліў Сяргей Карсюк. – Энерганасычаныя трактары і пасяўныя агрэгаты ўжо цалкам гатовы.
У момант нашага наведвання ў майстэрні зварачнымі работамі займаўся Юрый Паніч, а бягучым рамонтам трактара – механізатар Мікалай Лук’янчык.
Прыемна, што ў вытворчых памяшканнях утульна і па-свойму чыста, ды і настрой у людзей аптымістычна-працоўны. Умовы для правядзення рамонту і камфорту работнікаў створаны добрыя: майстэрня ацяпляецца, ёсць пакой прыёму ежы, пакой адпачынку, душавыя.
Фота аўтара
Комментарии