Сёлета свята сабрала яркія выступленні з 23 раёнаў. Капыльшчына прадставіла яркую праграму, цэнтральным элементам якой стаў творчы нумар «Сказ пра Капыль». Ён быў прысвечаны 1020-годдзю горада і створаны на аснове аднайменнай аўтарскай песні Вольгі Даманскай, музыка Аляксандра Ермакова.
На сцэну выйшлі лепшыя творчыя сілы раёна: харэаграфічныя калектывы Капыльскай дзіцячай школы мастацтваў, артысты Капыльскага РЦК: салісты Аляксандр Ермакоў, Захар Нікіценка, Вячаслаў Курчык і харэаграфічны калектыў, а таксама абрадавы гурт «Цары» Семежаўскага цэнтра культуры і вольнага часу, тэатр моды «МодиЮн». Іх выступленні, якія спалучалі народныя матывы, цёплы гумар і высокае майстэрства, атрымалі прызнанне.
– Мы ганарымся тым, што змаглі годна прадставіць традыцыі і творчы патэнцыял Капыльскага раёна на такой маштабнай культурнай пляцоўцы, – каменціруе начальнік аддзела ідэалагічнай работы, культуры і па справах моладзі райвыканкама Ларыса Юха. – Нашы калектывы выступілі зладжана і натхнёна, што пацвярджае высокая ацэнка журы – Дыплом лаўрэата II ступені. Для нас гэта не проста ўзнагарода, а сведчанне таго, што Капыльскі раён працягвае актыўна захоўваць і развіваць народную творчасць, аб'ядноўваючы людзей любоўю да сваёй культуры.
Комментарии