Зацірка
Зацірка – страва з пшанічнага, грэцкага ці яечнага прэснага цеста, якое праціралі праз рэшата або паміж рук. Страва была не вельмі пажыўнай, таму казалі: «Лахман не адзежа, зацірка не ежа».
Прадукты: 1,5 шклянкі мукі, 1–2 яйкі, 40 г сметанковага масла, 6–7 шклянак малака, соль.
Гатуем. Прасеяную пшанічную муку падсмажыць на патэльні без масла да светла-карычневага колеру, дадаць трошкі вады, яйка, масла, соль, старанна перацерці. Атрыманыя камячкі цеста засыпаць у каструлю з кіпячым малаком. Варыць 5–7 хвілін на невялікім агні, памешваючы. Дадаць соль на смак.
Бульба, тушаная з грыбамі
Беларускую кухню цяжка ўявіць без страў з грыбамі. У кожнай запаслівай гаспадыні ў любую пару былі і сушаныя баравічкі, і салёныя апенькі.
Прадукты: 800 г бульбы, 500 г грыбоў свежых або 50 сушаных, 120 г сала або 4 ст. лыжкі таплёнага масла, соль, перац, лаўровы ліст, пятрушка.
Гатуем. Ачышчаныя і прамытыя грыбы абліць варам, парэзаць і абсмажыць на сале або масле ра-зам з пакрышанай цыбуляй. Бульбу абабраць, нарэзаць вялікімі скрылікамі, пакласці разам з грыбамі ў жароўню. Дадаць соль, перац, уліць ваду і тушыць на слабым агні да гатоўнасці. У канцы тушэння пакласці лаўровы ліст, пятрушку. Калі грыбы сушаныя, то іх трэба загадзя замачыць, адварыць, нарэзаць і абсмажыць.
Гарохавыя камы
Камы гатавалі з адваранага гароху, бобу ці бульбы, якія таўклі ў ступе да атрымання пэўнай клейкасці. Іх выкарыстоўвалі на заедкі ці перакускі і бралі ў дарогу.
Прадукты: 100 г гароху, 100 г свіной грудзінкі скрылікамі, 1 ст. лыжка алею, па 20 г белай і чырвонай фасолі, 1 ст. лыжка паніровачных сухароў, соль, перац на смак.
Гатуем. Гарох і белую фасолю замачыць на 6–7 гадзін, адварыць у пасоленай вадзе і размяць у кашу, дадаючы соль і перац. Асобна адварыць замочаную чырвоную фасолю. З кашыцы сфармаваць невялічкія «галкі» (шарыкі), паклаўшы ў сярэдзіну кожнай адну чырвоную фасоліну, абгарнуць у тонка нарэзаную грудзінку і падсмажыць. Падаваць са смятанай, зелянінай, грыбамі.
Комментарии