Сустрэча з насельніцтвам
У в. Крыніца прайшла сустрэча з насельніцтвам. Мясцовыя жыхары абмеркавалі пытанні добраўпарадкавання населеных пунктаў, работы з пустуючымі дамамі і ўчасткамі, скошвання пустазелля на прыдамавых тэрыторыях і землях агульнага карыстання.
– Год добраўпарадкавання прадугледжвае комплекс мерапрыемстваў, накіраваных на паляпшэнне якасці жыцця і арганізацыю эстэтычна прывабнага асяроддзя. Рэалізацыя гэтых ініцыятыў ажыццяўляецца сумесна з арганізацыямі і насельніцтвам, – адзначыла старшыня сельвыканкама Нэла Гусева.
У аснове – бяспека
Сельвыканкам разам з РАНС абследуюць умовы пражывання грамадзян. На гэты раз камісійна праверылі 28 сем’яў з ліку шматдзетных і сем’і, дзе ажыццяўляецца догляд інвалідаў І групы.
У ходзе сустрэч начальнік ПАВП-13 в. Слабада-Кучынка Рэнат Макарэвіч (на здымку) расказаў сельскім жыхарам пра абстаноўку з пажарамі і надзвычайнымі становішчамі на тэрыторыі раёна і вобласці, агучыў асноўныя прычыны пажараў і гібелі людзей ад іх з прывядзеннем канкрэтных прыкладаў.
Акрамя таго, работнікі сельвыканкама і пажарныя правялі паўторны маніторынг на сямі вадаёмах: праверылі наяўнасць інфармацыйных таблічак з надпісам «Купанне забаронена».
З гаспадарскім падыходам
На тэрыторыі сельсавета ідзе актыўная работа па навядзенні парадку на зямлі. У аснове – скошванне пустазелля. Так, прыбрана смецце і скошана трава на 11 грамадзянскіх могілках. Па трэцім разе абкошаны помнікі. Акрамя таго, з удзелам ААТ «Старыца-Агра», жыхароў вёсак наводзіцца парадак каля домаўладанняў, адміністрацыйных будынкаў. Знесены яшчэ адзін пустуючы дом у в. Бадзяжы. У в. Свідзічы спілавалі 16 сухастойных і аварыйных дрэў за кошт бюджэтных сродкаў і сродкаў грамадзян. Праведзены рамонт дарожнага пакрыцця ў вёсках Бор і Чарнічнае.
Чым багаты, тым і рады
У мінулыя выхадныя аграрыі ААТ «Старыца-Агра» прадставілі сваю лакацыю на Кургане Славы. Упрыгожванні старыцкага падворка знаёмілі прахожых з гісторыяй Вялікай Айчыннай вайны, асаблівасцямі вытворчасці сельгаспрадпрыемства. Немагчыма было адарваць погляд ад вынаходніцтва на сталах. Як заўсёды, мясныя, рыбныя і агароднінныя стравы, разнастайная выпечка і разнасол не пакінулі абыякавым нават самага вытанчанага гурмана. Сімпатычныя гаспадыні з чароўнымі ўсмешкамі на тварах былі рады вітаць кожнага, хто цікавіўся дадзенай лакацыяй. Ні адзін чалавек не пайшоў без пачастунку.
Комментарии