Трыццаць падарункаў ад раённага выканаўчага камітэта, раённай арганізацыі РГА “Белая Русь” атрымалі дзеці, якія напярэдадні Новага года знаходзіліся ў цэнтральнай раённай бальніцы. Традыцыйнае мерапрыемства стала сапраўдным святам для хлопчыкаў і дзяўчынак дзіцячага, хірургічнага і інфекцыйнага аддзяленняў установы аховы здароўя.
Старшыню райвыканкама Анатоля Жданеню, намесніка старшыні Алу Раеўскую, намесніка начальніка аддзела ідэалагічнай работы, культуры і па справах моладзі Наталлю Гарбацэвіч, а таксама Дзеда Мароза і Снягурку дзеці вельмі чакалі. З гэтай нагоды яны апрануліся ў прыгожыя сукенкі і касцюмы. Вершы і песні пра навагодняе свята дарылі прысутным дзеці, а ўзамен пад шчодрыя апладысменты ганаровых гасцей, супрацоўнікаў аддзяленняў атрымлівалі салодкую “тэрапію” — доўгачаканыя падарункі ад Дзеда Мароза і Снягуркі. Галоўныя пажаданні, якія прагучалі для хлопчыкаў і дзяўчынак, — хуткае выздараўленне і толькі выдатныя навіны ў наступным годзе.
Асабліва прыемна было для гасцей убачыць у радзільным аддзяленні столькі шчаслівых усмешак жанчын, якія нядаўна сталі маці (напярэдадні наведвання ў аддзяленні нарадзілася шасцёра немаўлят). Здароўя і сямейнага дабрабыту жадалі прадстаўнікі раённай улады. Разам з найлепшымі пажаданнямі маладыя матулі атрымалі навагоднія падарункі.
Сяргей ЛАЗОЎСКІ
Фота аўтара
Комментарии