Дыпломам II ступені ўпраўлення адукацыі Мінаблвыканкама ўзнагароджаны навучэнец УА «Капыльскі дзяржаўны каледж» Вадзім Дашукевіч, які паспяхова выступіў на абласным конкурсе прафесійнага майстэрства сярод навучэнцаў.
Спаборніцтва праходзіла на базе рэсурснага цэнтра вытворчага навучання, створанага на базе Капыльскага дзяржаўнага каледжа. Свае веды і навыкі па прафесіі «Электраманцёр» паказвалі 10 юнакоў з пяці ўстаноў адукацыі.
Маргарыта САКОВІЧ 
На ІІ адкрытым фестывалі-конкурсе «Свята саксафона», які праходзіў у Маладзечне, узорны эстрадны аркестр Дзіцячай школы мастацтваў (кіраўнік Леў Канаплянік) узнагароджаны Дыпломам І ступені ў намінацыі «Аркестры».
Акрамя гэтай ганаровай узнагароды калектыву ўручылі і каштоўны падарунак — мікрахвалевую печ «Гарызонт».
Дзіяна ТКАЧЭНКА 
КУП «Капыльская ЖКГ» сёлета быў набыты 261 новы кантэйнер для збору другасных матэрыяльных рэсурсаў.
Яны прызначаны для ўстаноўкі ў буйных сельскіх населеных пунктах раёна. Увогуле, на балансе раённай камунальнай службы знаходзіцца 689 кантэйнераў, пад іх у горадзе і аграгарадках абсталяваны спецыяльныя кантэйнерныя пляцоўкі.
Маргарыта САКОВІЧ 
Калектыў Капыльскага цэха ўльтракароткахвалевай радыёстанцыі па выніках абласнога спаборніцтва за званне «Лепшае падраздзяленне Галаўнога прадпрыемства рэспубліканскага ўнітарнага прадпрыемства «Беларускі радыётэлевізійны перадаючы цэнтр» за першы квартал 2015 года ўзнагароджаны Ганаровай граматай. Дарэчы, такую ж узнагароду ён атрымаў і па выніках мінулага года.
Сяргей КОЗЕЛ 
Перасяванне загінуўшых плошчаў азімага рапсу ў гаспадарках раёна правялі на 3021 гектары, паведамілі ва ўпраўленні райсельгасхарчу.
Пасевы алейнай культуры былі пашкоджаны на 47% плошчаў (летась — на 8%). Большы працэнт гібелі пасеваў у мінулую зімоўку спецыялісты тлумачаць адсутнасцю снежнага покрыва і нізкімі тэмпературамі ў начны час.
Крысціна ЖОГАЛЬ 
