Гістарычныя падзеі 14 жніўня
У 1385 годзе ў Крэўскім замку была падпісана ўнія паміж ВКЛ і Польшчай.
Хто нарадзіўся 14 жніўня
1794 год: Міхал Балінскі, беларускі гісторык і публіцыст.
1882 год: Аляксандр Мікульчык, беларускі паэт.
1925 год: Сяргей Міхальчук, беларускі празаік, перакладчык.
Таксама ў гэты дзень нарадзіліся канадскі пісьменнік, прыродазнавец, мастак-анімаліст Эрнест Сетан-Томпсан, англійскі пісьменнік, лаўрэат Нобелеўскай прэміі па літаратуры Джон Галсуорсі і амерыканская кінаактрыса Міла Куніс.
14 жніўня ў народным календары
Сёння адзначаецца Мядовы Спас і пачынаецца Успенскі пост. Таксама ў гэты дзень шануюць сем святых пакутнікаў Макавеяў, адкуль другая назва гэтага свята – Макавей.
Пчаляры пачынаюць збіраць мёд – "заломваюць соты". Іх потым свецяць у царкве, дзе пакідаюць частку мёду і частуюць жабракоў, адсюль прымаўка: "Сёння і жабрак мядку паесць". На Першы Спас таксама асвячаюць ваду: калодзежы, ручаі, рэкі, таму іншая яго назва – Спас на вадзе. Свячонай вадой акрапляюць хворых і хатніх жывёл. Гэты дзень лічыўся добрым для капання калодзежаў, іншыя цяжкія справы забараняліся.
Раніцай дзяўчыны ўмывалі твары расой, каб захаваць прыгажосць. "Ад першага Спаса халодныя росы – блізка ўжо восень".
Гаспадыні ў гэты дзень рабілі пірагі з макам, а ўвечары ў хаце збіралася моладзь – танцаваць і спяваць песні. Дзяўчыны варажылі: "Макавею, Макавею, я на цябе канапелькі сею. Скажы, Макавею, дзе мая пара, каб я з ім у гэтую ноч канапельку брала".
Комментарии