Павіншавалі з Новым годам
Падарункі да навагодніх святаў атрымала шматдзетная сям’я Гаўрылюк з аграгарадка Семежава. Дэпутат раённага Савета дэпутатаў па Семежаўскай акрузе Мікалай Варвашэня і прадстаўнікі Семежаўскага сельвыканкама павіншавалі з навагоднімі святамі названую сям’ю (на здымку). Падарылі кнігі, настольныя гульні для дзяцей, размалёўкі і іншае. Увогуле, усё тое, што карысна і цікава дзецям. Шматдзетныя бацькі Наталля і Юрый выхоўваюць пяцёра дзяцей. Не так даўно яны ўвялі ў эксплуатацыю вялікі, прасторны і светлы дом, які пабудавалі з дапамогай дзяржаўнай падтрымкі.
Ключы ад шчасця
Канец года для Семежаўскага сельсавета наогул багаты на наваселлі. Літаральна днямі шчаслівай уладальніцай новых квадратных метраў стала Анжэла Чаранкова з аг. Семежава. Шматдзетная маці выхоўвае чацвярых дзяцей: Ілону, Лізавету, Карыну і Марка. Жанчына працуе ў мясцовай гаспадарцы аператарам машыннага даення. Дом Анжэла пабудавала з дзяржаўнай падтрымкай, выкарыстала таксама сямейны капітал. Цяпер у сям’і свой дом, і ў якім у кожнага ёсць свая ўтульная мясцінка.
Участкі - у севазварот
У сельсавеце працягваюць работы па расчыстцы пустых участкаў. Чарговы безгаспадарны дом разбіраюць у вёсцы Чырвоная Дубрава. Апроч зносу самой хаты расчышчаюць і пустуючы ўчастак. Выканаць пастаўленыя задачы сельвыканкаму дапамагаюць работнікі будаўнічай брыгады ААТ «Семежава». Як толькі ўчастак будзе прыбраны, яго ўвядуць у севазварот. Усяго ж за папярэдні год расчысцілі сем пустых участкаў. Усе яны прылягаюць да палёў мясцовай гаспадаркі, таму ўжо ўведзены ў севазварот або яшчэ плануюць гэта зрабіць.
Пазнавальныя канікулы
Напярэдадні Новага года вучні пачатковых класаў Семежаўскай сярэдняй школы наведалі музей гісторыі слуцкіх паясоў. У музеі даведаліся пра прадстаўнікоў розных сусветных цывілізацый у пэўныя перыяды гісторыі, а таксама аб тым, як мяняліся знешні выгляд, стылістыка і функцыі пояса на працягу стагоддзяў, убачылі яго арыгінал і копію. Вядома, школьныя паездкі на канікулах надоўга застаюцца ў памяці хлопчыкаў і дзяўчынак, вучні іх чакаюць з вялікім нецярпеннем. Але кожная з такіх паездак — гэта не толькі забаўка, але яшчэ і пазнавальныя экскурсіі, якія дапамагаюць школьнікам лепш даведацца пра гісторыю сваёй роднай краіны.
Комментарии