Тое, што капыльская зямля багатая на таленты, яшчэ раз знайшло пацвярджэнне на конкурсе маладых мастакоў Міншчыны «Арт-сесія». Уладзіслаў Каваліу (на здымку), выпускнік аддзялення выяўленчага мастацтва Капыльскай ДШМ (выкладчык Святлана Швайбовіч), атрымаў дыплом II ступені ў намінацыі «Нацюрморт».
Конкурс «Арт-сесія» яшчэ досыць малады і ўключае ў сябе такія дысцыпліны, як «Малюнак», «Жывапіс», «Кампазіцыя» і «Скульптура». У гэтым годзе яго арганізатарам выступіла Дзіцячая мастацкая школа г. Жодзіна, дзе і адбылося ўрачыстае ўзнагароджванне пераможцаў.
Сама школа на дзень пераўтварылася ў мастацкую галерэю. Арганізатары прадставілі не толькі пераможцаў, але і працы, якім трошкі не хапіла, каб перамагчы.
В. П. Славук, вядомы беларускі графік, член Саюза мастакоў Рэспублікі Беларусь, які ўзначальваў журы, адзначыў высокі ўзровень дасланых на конкурс прац і складанасць, з якой вызначалі пераможцаў, бо многія творы заслугоўвалі ўвагі.
Прыемна было бачыць малюнак нашага земляка сярод іншых на выніковай выставе і адзначыць, што гэтая перамога - перамога не толькі Улада, але і яго выкладчыка Святланы Канстанцінаўны Швайбовіч, як вынік яе самаадданай, сістэматычнай працы.
Ганна НІЧЫПАРОВІЧ,
настаўнік выяўленчага мастацтва Капыльскай дзіцячай школы мастацтваў
Комментарии