Два днi ў рэспублiканскiм Доме ДТСААФ праходзiў другi адборачны тур фестывалю-конкурсу песнi «Ратнаму подзвiгу славу пяём», якi праводзiўся ў мэтах павышэння эфектыўнасцi патрыятычнага, духоўнага, культурна-эстэтычнага выхавання членаў ДТСААФ дапрызыўнай i прызыўной моладзi, прапаганды i папулярызацыi музычных твораў, нацыянальнай песеннай класiкi, сучасных патрыятычных i лiрычных песень, прыцягнення самадзейных выканаўцаў i слухачоў да лепшых твораў айчыннай музычнай культуры.
Асаблiвую значнасць гэтаму праекту надае наблiжэнне знамянальнай даты - 65-годдзе Перамогi савецкага народа ў Вялiкай Айчыннай вайне.
У адборачным туры Капыльскую раённую арганiзацыйную структуру ДТСААФ прадстаўлялi Вiктар Кот, Юрый Раманейка, Таццяна Драцкая, Барыс Канаплянiк, Iлля Броўка, Вольга Лобан і Арцём Майсюк.
У суботу гасцiнна сустрэла сталiца ўдзельнiкаў гала-канцэрта фестывалю-конкурсу песнi ДТСААФ. Каля Палаца чыгуначнiкаў дэманстравалася выстава спартыўнай тэхнiкi: матацыклы розных класаў, картынгi, вучэбныя аўтамабiлi. На пляцоўцы праводзiлiся паказальныя выступленнi юных картынгiстаў з рэспублiканскай дзiцячай юнацкай спартыўна-тэхнiчнай школы па аўтамотаспорце, якiя сабралi шмат гледачоў.
Увагу прысутных прыцягнуў агiтацыйны аўтобус упраўлення ДАI Мiнаблвыканкама, укамплектаваны сучаснай тэхнiкай, дзякуючы якой фiксуюцца ўсе парушэннi Правiл дарожнага руху, а таксама можна праверыць, якiя парушэннi мае той цi iншы грамадзянiн.
У фае палаца дэманстравалася агнястрэльная i пнеўматычная зброя. Жадаючыя мелi магчымасць разабраць i сабраць аўтамат Калашнiкава.
Гучаць пазыўныя фестывалю, падымаецца заслона. Вядучыя запрашаюць на сцэну пераможцаў i прызёраў II этапа рэспублiканскага фестывалю-конкурсу песнi ДТСААФ, які праводзіўся ў чатырох намiнацыях: песнi часоў Вялiкай Айчыннай вайны «I памяць сэрца гаворыць»; песнi пра Беларусь «Пяе мая Айчына»; эстрадны вакал «Песенны зарапад Беларусi»; аўтарская песня «Песнi, народжаныя сэрцам».
Трэба адзначыць, што сярод удзельнiкаў з дваццацi раёнаў Мiнскай вобласцi i горада Мiнска дастойна прадставiлi Капыльшчыну нашы землякi. У намiнацыi песнi часоў Вялiкай Айчыннай вайны Вiктар Кот за выкананне «Песенькі франтавога шафёра», (музыка Б. Макраусава, словы М. Лабкоўскага) быў удастоены першага месца. Юрый Раманейка за выкананне песнi «Ты помнiш» з рэпертуара Т. Нядзельскай адзначаны за актыўны ўдзел i высокае выканальніцкае майстэрства.
У намiнацыi эстрадны вакал журы адзначыла дуэт Вольгi Лобан i Iллi Броўкі за выкананне песнi «Касыя дажджы», (музыка Р. Паулса, словы I. Рэзнiка).
Хочацца падзякаваць нашым землякам i пажадаць далейшых творчых поспехаў. Тым больш, што Вiктар Кот прыме ўдзел у заключным фiнальным этапе рэспублiканскага фестывалю-конкурсу песнi ДТСААФ «Ратнаму подзвiгу славу пяём».
Аляксандр КАСІНСКІ,
старшыня Капыльскай РАС ДТСААФ
Комментарии