Правядзенне планавых рамонтаў і аператыўнае ўхіленне пашкоджанняў тэхнікі — гэта асноўныя абавязкі слесара па рамонце абсталявання ЗАТ «Жыліхава» Сяргея Сенюка.
Малады чалавек валодае ўсімі неабходнымі якасцямі для таго, каб справіцца з праблемамі, што ўзнікаюць. Ён заўсёды правільна ацэньвае сітуацыю і прымае хуткае рашэнне. Дзякуючы яго прафесіяналізму і майстэрству рамонт праходзіць своечасова і якасна.
У «Жыліхаве» Сяргей працуе параўнальна нядаўна: прыкладна каля чатырох гадоў, але зарэкамендаваў сябе добрым спецыялістам, які карыстаецца аўтарытэтам у калег. Пасля заканчэння Капыльскага сельскагаспадарчага ліцэя працаваў вадзіцелем у спецыяльным доме-інтэрнаце для састарэлых і інвалідаў, што ў Філіпавічах. Летам дапамагаў роднай гаспадарцы на жніве (нарадзіўся ён у Гулевічах, дзе ўсё жыццё працаваў і яго бацька), цяпер тут і ў Сяргея пастаяннае месца працы.
Маладая сям’я Сенюкоў жыве ў Семежаве. Жонка працуе прадаўцом у магазіне «Белыя Росы». Расце на радасць бацькам і дачушка, якая пакуль што ходзіць у дзіцячы сад.
Сяргей КОЗЕЛ
Фота Паўла ШЭІНА
Комментарии