Выбары Прэзідэнта Рэспублікі Беларусь уступілі ў новую фазу — агітацыйны перыяд. У адпаведнасці з арт. 45 Выбарчага кодэкса Рэспублікі Беларусь і Пастановай Цэнтральнай камісіі Рэспублікі Беларусь па выбарах і правядзенні рэспубліканскіх рэферэндумаў № 22 ад 1 ліпеня 2015 года праходзяць сустрэчы выбаршчыкаў з даверанымі асобамі кандыдатаў у Прэзідэнты Рэспублікі Беларусь.
17 верасня ў раённым Цэнтры культуры сабраліся прадстаўнікі калектываў, жыхары горада і сельскіх населеных пунктаў, ветэраны, моладзь раёна, каб выслухаць Івана Галаватага — давераную асобу кандыдата ў Прэзідэнты Рэспублікі Беларусь Аляксандра Лукашэнкі. У сустрэчы прынялі ўдзел старшыня райвыканкама Анатоль Жданеня, дэпутат Палаты прадстаўнікоў Нацыянальнага сходу Рэспублікі Беларусь Анатоль Бойка. Мерапрыемства прайшло ў канструктыўным русле і нагадвала, хутчэй, дыялог людзей, зацікаўленых у тым, каб наша родная Беларусь заўсёды была незалежнай, квітнеючай, развівалася як сацыяльная дзяржава, якая клапоціцца пра дабрабыт сваіх грамадзян.
Іван Іванавіч нагадаў аб дасягненнях краіны і Мінскай вобласці, у прыватнасці, спыніўся на асноўных тэзісах перадвыбарнай праграмы кандыдата, даверанай асобай якога ён з’яўляецца. Цікавымі былі і звесткі аб рабоце ААТ «Беларуськалій», якое ўзначальвае І. Галаваты.
У адрас даверанай асобы прагучала шмат пытанняў. Прысутных цікавілі як агульнадзяржаўныя, так і прыватныя праблемы. Напрыклад, як будучыя выбары змогуць змяніць наша жыццё? Ці прадугледжваецца зніжэнне ставак на крэдыты? Хваляваў капылян стан гарадскіх вуліц і дарог, а таксама пітной вады ў раёне і многае іншае.
Маргарыта САКОВІЧ
Комментарии