Сітуацыя з вытворчасцю жывёлагадоўчай прадукцыі ў сельгасфіліяле “Руднае” выклікае занепакоенасць ва ўпраўленні райсельгасхарчу. Па выніках работы за 9 месяцаў гаспадарка “мінусуе” па некаторых пазіцыях. Праблема бярэ свой пачатак у мінулым, калі два філіялы — “Руднае” і “Браткава” — існавалі паасобку.
Напрыклад, надой ад адной каровы ў СГФ “Руднае” ў 2010 годзе складаў 4733 кг, зніжэнне адбывалася і ў 2011 годзе — 4252 кг, і ў 2012 — 4139 кг. Падобная сітуацыя заўважана і ў СГФ “Браткава”: калі ў 2010 годзе надой складаў 3793 кг, то ў 2012 — 3607 кг. У 2013 годзе (пасля аб’яднання) гэты паказчык знаходзіўся на ўзроўні 3627 кг.
Ды і па выніках 9 месяцаў гэтага года ў аб’яднаным філіяле надаілі 2688 кг (на 101 кг менш, чым у папярэднім годзе). Такім чынам, падзенне вытворчасці малака ўвачавідкі, чаго нельга дапускаць, бо гэта штодзённае недаатрыманне сродкаў казной гаспадаркі.
Дзе ж хаваюцца недапрацоўкі? Прааналізаваць сітуацыю мы папрасілі першага намесніка начальніка ўпраўлення райсельгасхарчу Віталя Ракевіча. Як патлумачыў Віталь Аляксандравіч, асноўная прычына ў тым, што ўпушчана ўзнаўленне статка. Так, за 9 месяцаў выхад цялят складае 52 галавы на 100 кароў — практычна палова статка не расцялілася. Адпаведна, ад ялавай каровы недаатрымліваецца малако.
Яшчэ адно сур’ёзнае пытанне — недакормліванне жывёлы. Гаспадарка кожны год нарыхтоўвае недастаткова травяністых кармоў з-за высокага працэнта разворвання земляў і высокай шчыльнасці жывёлы. Напрыклад, сёлета тут нарыхтавана толькі 16,5 цэнтнера кармавых адзінак на ўмоўную галаву (гэта самы меншы паказчык у раёне), што таксама на 1,4 ц к. адз. менш, чым у 2013 годзе.
Ёсць заўвагі і па рабоце з дойным статкам. Летась на МТФ “Руднае” быў уведзены новы даільна-малочны блок, на якім сёння атрымліваюць толькі 7,6 кг малака ад адной каровы — адзін з самых нізкіх паказчыкаў у раёне. Здаецца, ферма была запоўнена першацёлкамі, аднак малако недаатрымліваецца. Перад спецыялістамі пастаўлена задача раздзяліць увесь статак па прадукцыйнасці, фізіялагічным стане і карміць па адпаведных рацыёнах.
Выклікае занепакоенасць і забеспячэнне гаспадаркі цялушкамі. У гэтым плане адчуваюцца ўпушчэнні браткаўскіх спецыялістаў, якія яшчэ ў 2011-2012 гадах рэзка скарацілі пагалоўе цялушак (да 86 галоў на 100 кароў). Цяпер жа ў сельгаспрадпрыемстве налічваецца 107 цялушак на 100 кароў, пры тым, што да аб’яднання ў “Рудным” заўсёды было не менш, чым 140 галоў цялушак на 100 кароў.
На вырошчванні маладняку БРЖ перад СГФ “Руднае” стаіць задача атрымліваць сярэднясутачную прывагу 675 г, якая таксама не выконваецца. Як і ў папярэднія гады, гэты паказчык знаходзіцца на ўзроўні прыкладна 600 г.
Ёсць у сельгаспрадпрыемстве і пэўныя праблемы з добраўпарадкаваннем тэрыторый. Нягледзячы на тое, што ўжо асенні час, некаторыя аб’екты яшчэ не абкошаны з лета (у прыватнасці, МТФ “Руднае”), а на МТФ “Заракаўцы” падчас нашага наведвання на выгульным двары адсутнічала салома, не быў выдалены гной і з памяшкання.
Увогуле ж для выпраўлення неадназначнай сітуацыі робяцца некаторыя захады. З гэтай мэтай была праведзена сустрэча зоаветэрынарнай службы раёна са спецыялістамі гаспадаркі па прыняцці неабходных мер. У прыватнасці, узмоцнена работа па кантролі за каровамі, якія не прыходзяць у ахвоту, на лістапад адабрана на дадатковае асемяненне на 30 цялушак больш, чым запланавана, складаецца неабходны рацыён кармлення.
І ўжо ёсць некаторыя зрухі ў лепшы бок. Калі меркаваць па апошніх даных, то валавая вытворчасць малака цяпер складае 112% да 2013 года, надой ад адной каровы павялічыўся апошнім часам на 700 г. Таму ёсць надзея, што сітуацыя сапраўды выправіцца.
Сяргей КОЗЕЛ
Комментарии