Ужо прайшло звыш дзесяці гадоў з моманту, калі з’явілася ААТ «Капыльскі райаграсэрвіс». Утворана яно было шляхам аб’яднання асобных прадпрыемстваў і гаспадарак у адну сістэму. Першапачаткова да раённай сельгастэхнікі далучылі сельгасхімію, затым ААТ «Капыльскае райаграпрамзабеспячэнне». Праз некаторы час таварыства папоўнілася сельгаспрадпрыемствамі «Руднае» і «Браткава». У выніку рэарганізацыі атрымалася цэнтралізаванае прадпрыемства з традыцыйным сельскагаспадарчым напрамкам, якое выразна вылучаецца станоўчай дынамікай развіцця. Так, выручка ад рэалізацыі тавараў і паслуг за мінулы год склала 94 млрд 80 млн рублёў (102% да 2012 года).
Акрамя развіцця раслінаводства і жывёлагадоўлі асноўнымі відамі дзейнасці ААТ “Капыльскі райаграсэрвіс” з’яўляецца рамонт сельскагаспадарчай тэхнікі, вузлоў і агрэгатаў да яе, грузаперавозкі, аказанне паслуг па механізаваных работах і аграхімічным абслугоўванні сельскагаспадарчых прадпрыемстваў. Акрамя таго, работнікі сэрвіснай арганізацыі займаюцца мантажом абсталявання для жывёлагадоўчых фермаў, аптовым гандлем мінеральнымі ўгнаеннямі, сродкамі аховы раслін, а таксама матэрыяльна-тэхнічным забеспячэннем запаснымі часткамі і гаруча-змазачнымі матэрыяламі.
Як бачна, спектр паслуг даволі аб’ёмны. Але ўсё ж асноўны акцэнт у райаграсэрвісе зроблены на рамонтна-аднаўленчыя работы сельскагаспадарчай тэхнікі ўсіх узораў на базе цэнтральнай рамонтнай майстэрні.
— Мы праводзім рамонт і наладку збожжаўборачнай тэхнікі розных мадыфікацый, комплексаў для нарыхтоўкі кармоў, касілак, прычэпаў. Да таго ж, сваімі сіламі наладзілі вытворчасць цэлай лінейкі асобных дэталей, вузлоў і нават механізмаў, — расказвае дырэктар ААТ “Капыльскі райаграсэрвіс” Анатоль Чаркас. — Рамонтны перыяд у нас доўжыцца круглы год і пачынаецца адразу пасля жніва. Рамантуем пераважна камбайны КЗС-10, КЗС-1218. Пры плане за мінулы год наладзіць 14 камбайнаў мы, можна сказаць, далі другое дыханне 16 адзінкам тэхнікі і не атрымалі ніводнай скаргі. Увогуле ў нас ёсць магчымасць даводзіць да ладу звыш 20 збожжаўборачных агрэгатаў. Сярэдні кошт аднаго рамонту складае каля 150 млн рублёў.
Працуюць у гэтым цэху сапраўдныя майстры сваёй справы. Сярод іх — Сяргей Булат, які адказвае за поўны рамонт і аднаўленне рухавікоў, слесары па рамонце сельгастэхнікі Ігар Берднік і Аляксандр Гурло, бляхары Дзмітрый Чарнушэвіч і Валянцін Валажынскі, звар-шчыкі Міхаіл Апанасчык і Міхаіл Траяновіч. А дзякуючы намаганням начальніка цэха Уладзіміра Якубоўскага асвоены новы від прадукцыі — вокны для жывёлагадоўчых аб’ектаў. Іх ужо выраблена і прададзена звыш 150 штук. Да таго ж, заяўкі прадаўжаюць паступаць. Таксама зараз прапрацоўваецца пытанне па вырабе індывідуальных домікаў для маленькіх цялят.
[caption id="attachment_37537" align="aligncenter" width="570"]
В. Валажынскі[/caption]
У свой час перад інжынернай службай прадпрыемства была пастаўлена задача ўсталяваць стэнды для разборкі і абкаткі дызельных сілавых агрэгатаў. У выніку аграсэрвіс стаў аказваць паслугі па рамонце рухавікоў гаспадаркам раёна. Толькі за дзевяць месяцаў гэтага года ўласнымі сіламі было адрамантавана 69 дызеляў. У цэху па рамонце электрарухавікоў за адзін год вярнулі да жыцця 450 сілавых электраагрэгатаў.
Магчыма, яшчэ не ўсе добра ведаюць, што на прадпрыемстве працуе цэх па рамонце шын і шынамантажны цэнтр. Па нямецкай тэхналогіі “Тір-Тор” спецыялісты змогуць аднавіць шыны любых памераў (нават парэзы да 20 см).
[caption id="attachment_37538" align="aligncenter" width="429"]
І. Берднік[/caption]
Вялікі аб’ём работ праводзіцца па рамонце памяшканняў (напрыклад, зараз гэта камбайнавы цэх) і добраўпарадкаванні тэрыторый. Так, апошнім часам устаноўлены новыя 40-тонныя вагі і адрамантаваны дах на базе па хімічным абслугоўванні.
У мэтах аказання паслуг аграрыям двума брыгадамі, укамплектаванымі спецыялістамі шырокага профілю, арганізавана і наладжана работа па мантажы і рамонце даільнага, паільнага абсталявання, сістэм каналізацыі і ўсталёўцы агародж.
З улікам традыцыйнай падрыхтоўкі глебы да сяўбы створаны аддзел па аграхімічным абслугоўванні гаспадарак. У ліку яго задач — вапнаванне кіслых глеб, здабыча і вывазка торфу, унясенне арганічных і мінеральных угнаенняў і інш. Напрыклад, тры звяны мехатрада ўжо за гэты год вывезлі звыш 150 тысяч тон арганікі, унеслі каля 145 тысяч тон. Па ўсіх названых пазіцыях нормы выконваюцца, а па асобных і перавыконваюцца.
Аднак, як заўважыў Анатоль Чаркас, патрабуюць рашэння і некаторыя фінансавыя пытанні. Сельгаспрадпрыемствы раёна за аказаныя паслугі па рамонце сельгастэхнікі, за ўнясенне арганікі на палі запазычылі ААТ “Капыльскі райаграсэрвіс” у агульнай суме 18 млрд рублёў.
— Кіраўніцтва райаграсэрвісу добра разумее, які на яго ўскладваецца груз адказнасці за дапамогу сельгасарганізацыям раёна, — адзначае першы намеснік старшыні райвыканкама начальнік упраўлення райсельгасхарчу Анатоль Ладыга. — Аднак не ўсе разлічваюцца за аказаныя паслугі. Паколькі сэрвісная арганізацыя нікога не пакідае без увагі, то і ёй неабходна ісці насустрач, каб прадпрыемства паспяхова развівалася.
Сяргей КОЗЕЛ
Фота Паўла ШЭІНА
Комментарии