Белаграпрамбанк стаў ініцыятарам акцыі, якая называецца “Твае першыя фінансы”, закліканай пазнаёміць школьнікаў з асновамі фінансавай граматы.
У рамках гэтага агульнарэспубліканскага сацыяльнага праекта, які праходзіў з 3 па 12 верасня, каля 25 тысяч вучняў 5-х класаў сельскіх, а таксама некаторых гарадскіх школ краіны атрымалі спецыяльныя падарункі. Акрамя таго, спецыялісты банка правялі імправізаваныя заняткі, конкурсы і віктарыны, якія ў цікавай і даступнай форме дазваляюць даведацца аб фінансавай грамаце.
У Капыльскім раёне дзецям таксама пашчасціла паўдзельнічаць у акцыі – 157 вучняў з розных вясковых школ атрымалі падарункі ад спецыялістаў аддзялення. У адзін з запланаваных дзён нам давялося пабываць у Цімкавіцкай сярэдняй школе імя Кузьмы Чорнага. Намеснік начальніка РКЦ №28 у г. Капылі ф-ла ААТ «Белаграпрамбанк»-Мінскае абласное ўпраўленне Наталля Астраух і спецыяліст па аперыцыйна-касавай рабоце аддзела рознічных паслуг Наталля Загорская расказалі вучням аб карыстанні грашыма і банкаўскай карткай, паказалі інфармацыйныя слайды. Дзеці даведаліся аб тым, што карыстацца банкаўскай карткай вельмі зручна, а напрыканцы занятка па фінансавай грамаце кожны атрымаў у падарунак каляндар, брашуру, лісток раскладу заняткаў і паветраны шарык з лагатыпам банка.
Трэба сказаць, што акцыя стала вельмі карыснай справай, бо дзеці такога ўзросту ўжо павінны ўсведамляць, якую каштоўнасць прадстаўляюць грошы.
Павел ШЭІН
Фота аўтара
Комментарии