[caption id="attachment_36567" align="aligncenter" width="570"]
Выхаванцы “Сонейка”[/caption]
Летні аздараўленчы лагер “Сонейка” з дзённым знаходжаннем дзяцей працаваў на базе ДУА “Слабадакучынская СШ”. Для 23 хлопчыкаў і дзяўчынак былі створаны ўсе ўмовы для карыснага, захапляльнага і развіваючага дзіцячага адпачынку.
Сезон 2014 года ўжо не першы ў гісторыі школы. Пад кіраўніцтвам Людмілы Корбут (старшы выхавацель) распрацавана выдатная праграма па арганізацыі адпачынку: святы, гульні, конкурсы, экскурсіі і кастры.
У лагеры працавалі гурткі: “Танцавальны”, “Патрыёты Радзімы”, “Спартыўныя гульні”, “Рукадзель- ніца”. Там дзеці змаглі навучыцца новаму. Шмат увагі надавалася заняткам на паветры. Прайшоў міні-паход ва ўрочышча Крынічка, дзе турысты з задавальненнем вучыліся не толькі ставіць палатку, а і пячы бульбу, сала. Цікавай стала і гульня “Зарніца”, падчас якой дзеці атрымалі навыкі арыентавання на мясцовасці.
З вялікім задавальненнем у час экскурсіі па Капыльшчыне вучні наведалі мемарыял на месцы спаленай вёскі Масявічы, помнік удзельнікам Лаўскага бою. Да магіл партызан і мірных жыхароў былі ўскладзены кветкі. Наталля Бохан, настаўнік геаграфіі і кіраўнік праекта “Героі Савецкага Саюза Капыльскага раёна”, расказала прысутным аб падзеях 1941-1944 гг. Цікава тое, што сярод удзельнікаў Лаўскага бою быў 16-гадовы юнак Валодзя Качаноўскі з вёскі Слабада-Кучынка. Затым вучні наведалі храм Святой Троіцы ў вёсцы Цялядавічы. Там дзяцей гасцінна сустрэў настаяцель храма Генадзь Корнеў і пазнаёміў з помнікам драўлянага дойлідства XVIII стагоддзя з элементамі класіцызму. У дар ад царквы дзеці атрымалі крыжыкі і паставілі свечкі за здароўе ўсіх дзяцей у свеце.
Было наладжана супрацоўніцтва з Слабада-Кучынскай сельскай бібліятэкай. Яе загадчык, Валянціна Барташэвіч, арганізавала выставы кніг, правяла змястоўныя мерапрыемствы (“Час кнігі”, “Дзень чытача” і інш.).
У школе адбылося ўручэнне ўзнагарод апошнім ветэранам вайны і вязням фашызму, прымеркаванае да 70-годдзя вызвалення краіны ад нямецка-фашысцкіх захопнікаў. У школьным музеі імя І. С. Трацэўскага праведзена літаратурна-музычная гадзіна “Мы помнім!” Са словамі прывітання да ўдзельнікаў мерапрыемства звярнуўся Васіль Скрыннікаў – палкоўнік, намеснік старшыні Рэспубліканскага савета ГА “Беларускі саюз афіцэраў”. Свае вершы прачытала самабытная паэтэса Капыльшчыны Ядвіга Малевіч. Актыўна ўдзельнічалі ў гэтым мерапрыемстве выхаванцы лагера Аляксандр Пратасевіч, Юрый Нікановіч, Аляксандр Давідоўскі, Вольга Міхайлоўская, Крысціна Францкевіч, Яна Коршук і іншыя. Нельга не адзначыць актывістаў БРСМ Вікторыю Коршук і Святлану Кунцэвіч. Ля стэнда “Імя ў гісторыі” была арганізавана ганаровая вахта.
Неабходна адзначыць, што кожны дзень у лагеры “Сонейка” быў насычаны разнастайнымі заняткамі і адпачынкам.
Барыс ДЗЕНІСЮК,
кіраўнік рэгіянальнага цэнтра вуснагістарычных даследаванняў, член ГА “Беларускі саюз афіцэраў”
Комментарии