Прыемная навіна напярэдадні прафесійнага свята кааператараў прыйшла з Мінскага аблспажыўсаюза: Капыльскае райспажыўтаварыства па выніках гаспадарча-фінансавай дзейнасці за мінулы год заняло трэцяе месца ў вобласці (хаця яшчэ па выніках 2011 года яно было ў ліку адстаючых).
Аналіз паказвае, што ў даволі няпростых эканамічных умовах райспажыўтаварыствам падтрымліваецца стабільная сітуацыя на спажывецкім рынку і насельніцтва забяспечваецца неабходнымі таварамі. На дадзены момант спажывецкая кааперацыя раёна аб’ядноўвае каля дзесяці галін і сфер дзейнасці, якія паказваюць неблагія вынікі. Напрыклад, тэмп росту тавара- абароту гандлю за 2013 год да ўзроўню папярэдняга года ў супастаўных цэнах склаў 105,3% (6 месца сярод раёнаў вобласці), грамадскага харчавання — 109,1% (9 месца), аб’ём вытворчасці прамысловай прадукцыі — 108,7% (2 месца), закупак сельгаспрадукцыі і сыравіны ў насельніцтва — 101,2% (10 месца). Рэнтабельнасць чыстага прыбытку па выніках года склала 0,39% (0,28% — па аблспажыўсаюзе), а прыбытку ад рэалізацыі тавараў, работ, паслуг — 1,77% (0,73%).
— І хаця закладзены даволі трывалы фундамент для далейшага развіцця, але не ўсе задачы яшчэ поўнасцю выкананы, — адзначае старшыня праўлення Валерый Урбановіч. — Таму няма ніякіх падстаў для самазаспакаення. У першую чаргу мы павінны крытычна ацэньваць сваю работу, пастаянна аналізаваць недахопы і ставіць перад сабой мэты на перспектыву.
Для гэтага развіваецца матэрыяльна-тэхнічная база, укараняюцца новыя формы работы. Так, у мінулым годзе быў мадэрнізаваны кандытарскі цэх у аграгарадку Цімкавічы, устаноўлена новае абсталяванне ў Капыльскім кааппраме, набываюцца аўтамагазіны, адкрыты буфет у ЦРБ, у магазіне “Зімняя вішня” дзейнічаюць пастаянныя скідкі, што дазволіла павялічыць тавараабарот у гандлёвай кропцы ў два разы. Традыцыйным стала правядзенне шматлікіх кірмашоў і акцый.
Дабрабыт спажывецкай кааперацыі ў многім вызначаецца ўменнем працаваць, выконваць свае абавязкі, знаходзіць новыя рашэнні штодзённых задач і залежыць ад якаснага складу работнікаў, ад іх вопыту і прафесіяналізму. Нямала такіх людзей у Капыльскім райспажыўтаварыстве. Сярод тых, хто атрымае ўзнагароды да прафесійнага свята, у праўленні назвалі вядучага тавараведа Наталлю Канончык, прадаўца магазіна ТПП аграгарадка Семежава Алену Галушка, прадаўца аўтамагазіна Валянціну Лазоўскую, кандытара Капыльскага кааппрама Іну Калядка, начальніка вытворчасці кааппрама Тамару Абрамовіч.
Сяргей КОЗЕЛ
Комментарии