Напрыканцы 2013 года шаснаццаць жыхароў раёна атрымалі ключы ад новых кватэр, якія ўзведзены ў г. Капылі дзякуючы дзяржаўнай праграме “Сацыяльнае жыллё”.
Навасёлы прымалі віншаванні ад старшыні райвыканкама Анатоля Жданені, намесніка старшыні райвыканкама па будаўніцтве і жыллёва-камунальнай гаспадарцы Леаніда Бурака, дырэктара інвестыцыйна-будаўнічага камунальнага ўнітарнага прадпрыемства “УКБ-Капыль” Сяргея Цімашэнкі і дырэктара Капыльскага РБУ (будаўнічай арганізацыі, якая ўзводзіла дом) Георгія Карэева.
Будаўніцтва сацыяльнага жылля для капылян — гэта, можна сказаць, справа новая. Фундамент двухпавярховага будынка быў закладзены яшчэ ў 2011 годзе.
З-за нестабільнага фінансавання здача аб’екта затрымлівалася, але ў 2013 годзе ход будаўніцтва паскорыўся. І вось ля прыгожага дома па вул. Партызанскай сабраліся шаснаццаць шчаслівых уладальнікаў новых кватэр. Квадратныя метры жылля атрымалі грамадзяне, якія стаялі на ўліку і мелі патрэбу ў паляпшэнні жыллёвых умоў, а таксама права на прадастаўленне жылых памяшканняў сацыяльнага карыстання.
Пад агульныя апладысменты ключы навасёлам уручыў Георгій Карэеў.
Сяргей ЛАЗОЎСКІ
Фота аўтара
Комментарии