У Салігорску адбылася абласная спартакіяда дзіцяча-юнацкіх спартыўных школ па валейболе, дзе, акрамя гаспадароў пляцоўкі, за першынство змагаліся спартсмены са Слуцка, Стоўбцаў, Нясвіжа, Дзяржынска, Клецка і Капыля.
У папярэдніх гульнях нашым валейбалістам з ДЮСШ АФП райкама прафсаюза работнікаў АПК не было роўных. Таму ў фінальную частку выхаванцы трэнера Валерыя Койпіша выйшлі без праблем, атрымаўшы тры перамогі ў трох сустрэчах. А вось у матчы за першае месца фартуна была не на баку капылян. У сустрэчы са слуцкай камандай ва ўпартай барацьбе нашы землякі саступілі-такі суседзям і ў выніку занялі другое месца.
Гонар Капыльшчыны адстойвалі Яўген Чалей, Павел Станіслаўчыц, Станіслаў Гардзей, Яўген Кудзёлка, Кірыл Сцельчанка, Яўген Дарашэвіч, Сяргей Конч, Аляксей Несцярчык, Арцём Рамановіч і Іван Бусел.
Упэўнены, што наступны старт капыльскіх юнакоў стане абавязкова “залатым”.
Комментарии