З мэтай ажыццяўлення дзяржаўнай палітыкі ў справе выяўлення і падтрымкі таленавітай моладзі аддзелам ідэалагічнай работы, культуры і па справах моладзі Капыльскага райвыканкама, Капыльскім раённым Цэнтрам культуры праводзіцца ІІ раённы конкурс маладых талентаў ”Зорка ўзышла над Беларуссю”.
Конкурс накіраваны на рэалізацыю творчага патэнцыялу таленавітай моладзі ў розных відах і жанрах мастацкай творчасці, далучэнне моладзі да лепшых узораў музычнага, тэатральнага, харэаграфічнага, выяўленчага, дэкаратыўна-прыкладнога і іншых відаў і жанраў мастацтва і інш.
Конкурс адбудзецца 18 снежня ў Капыльскім раённым Цэнтры культуры. Прыняць удзел могуць навучэнцы Капыльскага дзяржаўнага прафесійна-тэхнічнага каледжа, вучні агульнаадукацыйных школ горада і раёна, прадстаўнікі арганізацый, прадпрыемстваў, іншых устаноў ва ўзросце ад 16 да 31 года (узрост канкурсантаў вызначаецца па стане на 1 лістапада 2013 года).
Конкурс праводзіцца па наступных намінацыях: “Аўтарская песня”, “Дэкаратыўна-прыкладное мастацтва”, “Дызайн”, “Жывапіс і графіка”, “Народныя спевы”, “Размоўны жанр”, “Сучасны танец”, “Эстрадныя спевы”, “Рэжысура масавых свят, тэатралізаваных прадстаўленняў, шоу-праграм”, “Сацыяльная рэклама”.
Дзіяна ТКАЧЭНКА
Комментарии