Па-сапраўднаму восеньскі дажджлівы дзень падарыла школьнікам і настаўнікам надвор’е на свята Першага званка. Але гэта акалічнасць ніяк не сапсавала ўрачыстую атмасферу, якая панавала 1 верасня ў навучальных установах горада і раёна. Як заўсёды, вялікая ўвага была накіравана на самых юных удзельнікаў урачыстай лінейкі і тых, хто гэты дзень апошні раз сустракае ў сценах сваёй школы.
На “выдатна” прайшла прыёмку да новага навучальнага года гімназія №1 г. Капыля. Наперадзе – шмат задач, якія неабходна будзе рашаць настаўнікам сумесна са сваімі выхаванцамі. Менавіта на гэта нацэльвала калектыў дырэктар установы адукацыі Зінаіда Прыміч. Галоўнае – вырасціць і выхаваць годнага грамадзяніна нашай краіны.
Гімназіі ёсць чым ганарыцца: у апошні час выхаванцы адзінаццацігодкі на высокім узроўні выступаюць на абласных, рэспубліканскіх алімпіядах, навукова-практычных канферэнцыях, спартыўных спаборніцтвах.
Павіншаваць вучнёўскі і настаўніцкі калектывы прыйшлі ганаровыя госці – выконваючы абавязкі старшыні райвыканкама Анатоль Жданеня і начальнік аддзела адукацыі Аляксей Абросімаў. Грашовымі прэміямі і памятнымі падарункамі яны адзначылі пераможцаў абласных алімпіяд, канферэнцый, а таксама спартсменаў, якія адстойвалі гонар Міншчыны ў складзе зборнай вобласці.
Пад апладысменты настаўнікаў, вучняў і іх бацькоў Анатоль Жданеня і Аляксей Абросімаў уручылі першакласнікам падарунак Прэзідэнта Рэспублікі Беларусь – кнігу “Беларусь – наша Радзіма”.
Пасля залівістага першага званка вучні накіраваліся ў свае класы, дзе прайшоў урок на тэму “Беларусь – краіна маёй будучыні”.
Сяргей ЛАЗОЎСКІ
НА ЗДЫМКУ: падарунак першакласніку ад Прэзідэнта ўручае Анатоль Жданеня.
Фота аўтара
Комментарии