У Беларусі прыняты Закон “Аб унясенні дапаўненняў і змяненняў у некаторыя заканадаўчыя акты па пытаннях абароту зброі і ажыццяўлення ахоўнай дзейнасці”.
У дакуменце ўпершыню вызначаны тэрмін “агнястрэльная зброя траўматычнага дзеяння; патроны траўматычнага дзеяння”. Абарот такой зброі і боепрыпасаў, а таксама даўгаствольнай зброі з наразным ствалом калібру больш за 9,3 мм, якая мае мацаванне для штыкоў, заканадаўча забаронены на тэрыторыі краіны.
Уводзіцца новая разнавіднасць паляўнічай зброі – кідальная. Яна будзе выкарыстоўвацца для правядзення вальернага палявання з лукам ці арбалетам.
Спрашчаецца парадак набыцця паляўнічай зброі з наразным ствалом. Законам канкрэтызуецца пералік адміністрацыйных правапарушэнняў, пры ўчыненні якіх грамадзяне пазбаўляюцца права набываць зброю.
Дазвол на агнястрэльную зброю не атрымаюць тыя, хто ўчыніў наўмыснае нанясенне цялесных пашкоджанняў; дробнае хуліганства; стральбу з агнястрэльнай зброі ў населеным пункце ці там, дзе гэта забаронена; паўторна на працягу года пасля адміністрацыйнага пакарання распіваў алкагольныя ці слабаалкагольныя напіткі ў грамадскім месцы; з’яўляўся на работу ў стане алкагольнага ап’янення; кіраваў транспартным сродкам у стане алкагольнага ап’янення; дапускаў парушэнні правілаў вядзення паляўнічай гаспадаркі і палявання.
З пераліку на забарону набыцця зброі зніклі некаторыя дробныя адміністрацыйныя правапарушэнні, напрыклад, курэнне ў недазволеным месцы, прыём на работу без дакументаў і інш.
Зменшаны таксама тэрмін (з пяці да трох гадоў) на атрыманне паўторнага дазволу на зброю пасля анулявання. Зараз тым, хто мае грамадзянскую зброю з наразным ствалом, неабходна будзе паклапаціцца аб яе надзейным захоўванні. Давядзецца абсталяваць памяшканне або месца захоўвання зброі ахоўнай сігналізацыяй.
Уладзімір СКРЫПІНСКІ
Комментарии