З глыбокай верай у сэрцы, з надзеяй на жыццё вечнае спяшаюся вітаць Вас, сапраўдных вернікаў Рымска-каталіцкага Касцёла (Царквы), радасным воклічам “Хрыстос Уваскрос!” і жадаю, каб Добры Бог падтрымліваў Вас у кожную хвіліну жыцця, узмацняючы Вас духоўна і фізічна, натхняючы на новы плён працы.
Віншаванне са святам Вялікадня накіроўваю ў вельмі трапяткі для ўсяе каталіцкай супольнасці час, калі погляды свету скіраваны на Каталіцкую Царкву (Касцёл), на новага кіраўніка Святога Пасаду папу Францішка. Молімся за яго, Пятра нашага бурлівага часу, з перакананнем, што толькі Божае можа змяніць свет да лепшай будучыні.
Звяртаюся таксама і да вернікаў Беларускай Праваслаўнай Царквы: няхай Бог спашле ласку вытрываць у духоўных змаганнях, якія вядзеце ў нядаўна распачатым Вамі Вялікім Посце, і з яшчэ большай радасцю (бо ўжо трошкі цяплей будзе) сустрэць Найвялікшае Свята ўсяго хрысціянскага свету.
З добрымі пажаданнямі звяртаюся да ўсіх капылянаў: памятайце: ва ўсіх добрых пачынаннях сапраўдныя хрысціяне заўсёды будуць побач, каб дапамагчы, падтрымаць, быць салідарным.
Хрыстос уваскрос! – Сапраўды ўваскрос!
Аляксандр Тарасевіч,
Святар прыхода св.св. Пятра і Паўла ў Капылі
Парадак святочных богаслужэнняў у касцёле Святых Пятра і Паўла ў Капылі
30 сакавіка - ВЯЛІКАЯ субота. Асвячэнне велікоднай ежы будзе ў 10.00, 12.00, 14.00, 16.00 і 18.00 (пасля пасвячэння можна будзе прыступіць да споведзі), а таксама пасля Пасхальнай Вігіліі і рэзурэкцыйнай Св. Імшы.
У 20.00 пачнецца ПАСХАЛЬНАЯ ВІГІЛІЯ.
31 сакавіка - ПАСХАЛЬНАЯ НЯДЗЕЛЯ. РЭЗУРЭКЦЫЯ І СВ. ІМША пачнуцца ў 7.00.
СВ. ІМША - 12.00.
Комментарии