"Той, хто не ведае гісторыю свайго краю, хто не шануе сваё мінулае, не можа разлічваць на будучае”. Словы вядомага беларуска-польскага пісьменніка Уладзіслава Сыракомлі не раз узгадваліся падчас правядзення маладзёжнай валанцёрскай акцыі “Культурная спадчына Капыльшчыны”. Яе арганізатарамі выступіў аддзел па справах моладзі і аддзел культуры райвыканкама, РК ГА “БРСМ”. Праходзіла мерапрыемства на месцы былой сядзібы “Макраны” Семежаўскага сельскага Савета.
У другой палове ХVIII стагоддзя доктар тэалогіі Мікалай Вайніловіч купіў вёску Макраны. Адзін з яго сыноў заклаў тут сядзібу, дзе знайшлі месца дом, флігель, царква, сямейная капліца-пахавальня (крыпта), невялікі малочны завод, млын, пейзажны парк з вадаёмамі. Была ў Вайніловічаў і аранжарэя, дзе раслі трапічныя і субтрапічныя расліны, якія вывозіліся аж у Кіеў і Маскву!
Ні людзі, ні гады не пашкадавалі гэты цуд чалавечай працы. Тое, што засталося ад былой прыгажосці, выклікае жаль. Захаваліся руіны царквы, капліцы, рэшткі малочнага завода, піхтавая алея, крыпта з месца пахавальнага ператварылася ў сметнік.
27 маладых людзей – членаў валанцёрскага атрада “Крышталь”, які аб’ядноўвае працуючую моладзь горада, - шчыравалі на добраўпарадкаванні былой сядзібы. Агульнымі намаганнямі капліца была ачышчана ад смецця, прасветлены падыходы да малочнага завода, ссечаны кусты і скошана пустазелле, якія буялі навокал. Шчыра працавалі ўсе – як супрацоўнікі краязнаўчага музея, зацікаўленыя ў выніках, так і прадстаўнікі прадпрыемстваў горада. Хочацца адзначыць станоўчы вопыт супрацоўніцтва з раённым аддзелам па надзвычайных сітуацыях. Заўсёды адчуваецца яго дапамога і падтрымка ў правядзенні падобных мерапрыемстваў. Сучасныя “гаспадары” комплексу - Семежаўскі сельвыканкам і ВСК “Семежава” - таксама не засталіся ўбаку ад справы: старшыня сельсавета М. Кулік арганізаваў падкошванне травы, старшыня гаспадаркі А. Жданеня забяспечыў транспартам.
Амаль цэлы дзень працавалі валанцёры, паступова вызваляючы з палону тое, што было святым і дарагім для нашых продкаў. Працавалі, каб захаваць і выратаваць часцінку гістарычнага мінулага, часцінку будучага.
Валянціна БАЛАЖЫНСКАЯ,
начальнік аддзела па справах моладзі райвыканкама;
Таццяна ВАРАНЦОВА,
старшы навуковы супрацоўнік раённага краязнаўчага музея
НА ЗДЫМКУ: падчас добраўпарадкавання сядзібы.
Комментарии