Штогод на Шчодры вечар калядоўшчыкі віншуюць жыхароў Семежава і яго гасцей па вайсковай традыцыі XVIII стагоддзя. Абрад “Цары” Семежаўскага Цэнтра культуры і вольнага часу ўваходзіць у спіс аб’ектаў сусветнай нематэрыяльнай спадчыны ЮНЕСКА.
Стаць сведкамі гэтага неверагоднага відовішча яго арганізатары запрашаюць вас 13 студзеня. Мерапрыемства распачнецца ў 14.00 з правядзення “Каляднага кірмашу”. У праграме: калядныя гульні, спартыўныя і забаўляльныя атракцыёны, бяспройгрышная латарэя, выстава-продаж сувенірных вырабаў, дэгустацыя страў беларускай нацыянальнай кухні. Падчас “Каляднага кірмашу” выступяць народны тэатр гульні і гумару “Капыльскія пацехі”, народны ансамбль народнай песні “Спадчына”, удзельнікі мастацкай самадзейнасці Быстрыцкага СДК, фальклорны калектыў “Карані” Любанскага раёна. У планах работа выязнога гандлю: можна будзе паласавацца духмянымі шашлыкамі і піражкамі, выпіць шклянку гарачага чаю.
Калядны абрад “Цары” пачнецца ў 16.00. Яго ўдзельнікі пройдуць па вуліцах Семежава, завітаюць да жыхароў, дэманструючы даўні прыгожы абрад і несучы спадзяванні на шчасце і дабрабыт у бягучым годзе.
Марыя ШЭІНА
Фота Сяргея ЛАЗОЎСКАГА
Комментарии