Прыемна было назіраць, як руплівыя чарнагубаўцы завіхаліся каля сваіх падворкаў, наводзячы парадак. Хто ладзіў ці фарбаваў агароджу, хто падкошваў газон, а хто рупіўся каля нядаўна аздобленых кветнікаў. I ўсе хваляваліся: паспець бы да свята, бо часу засталося зусім нямнога.
Усіх хвалявала пытанне: чыю ж сядзібу прызнаюць лепшай, каму дастанецца прыз? Адны перавагу аддавалі сядзібе Корбутаў, другія спыняліся на сядзібе Шахраёў, а трэція прапаноўвалі Кавальчукоў. Вырашаць патрэбна будзе камісіі. Да свята рыхтавалася ўся вёска і з нецярпеннем чакала 3 ліпеня, калі можна будзе паслухаць добрую песню ды патанцаваць, адным словам, добра адпачыць. Даўно не было падобнага ў вёсцы!
Надвор’е ў гэты дзень выдалася надзвычай добрае. 3 раніцы свяціла сонейка, і гэта паляпшала і без таго святочны настрой. А дванаццатай гадзіне ля мясцовага сельмага на пляцоўцы пачалі ўстанаўліваць сталы для афармлення выставы, збірацца мясцовыя жыхары са сваімі вырабамі і выпечкамі. Тут жа была ўстаноўлена ганд-лёвая палатка, мангал для гатавання шашлыкоў, столікі для адпачынку.
Каля гадзіны дня загучала вясёлая музыка, прыехалі ўдзельнікі мастацкай самадзейнасці, і свята пачалося. На свята прыйшлі ўсе, хто толькі мог хадзіць. Такой масавасці не было ніколі. Мінутай маўчання былі ўшанаваны тыя, хто не вярнуўся з вайны і хто пайшоў з жыцця ўжо ў мірны час. Дарэчы, тэме Вялікай Айчыннай вайны была прысвечана цэлая старонка. Святочная праграма складзена так, што адзначаны былі людзі самых розных прафесій і ўзростаў. Кожнае віншаванне суправаджалася добрай песняй у выкананні самадзейных артыстаў, большасць з якіх з’яўляюцца жыхарамі вёскі Чарнагубава: Лэся Чаркас, Марына Баўтрук, Валерый Булат, Наталля Парэйка. Да сэрца былі таксама выступленні Валянціны Бярновіч, Таццяны Ермалінскай, Алы Дайнэкі, Алега Голубева.
Не абы-шлося без падарункаў. Пры падвядзенні вынікаў аб’яўленага конкурсу на лепшы па-дворак, кветнік, лепшага гаспадара і дызайнера былі ўручаны падарункі. Лепшай сядзібай камісія назвала сядзібу Андрэя і Валянціны Корбутаў. Дарэчы, Андрэй абраны дэпутатам Цімкавіцкага сельскага Савета. А гэта добры знак і прыклад для ўсіх жыхароў: раўняцца на свайго выбранніка. Лепшымі кветкаводамі аднагалосна былі пры-знаны Тамара Мікалаеўна і Уладзімір Мацвеевіч Кавальчукі, а вось лепшым дызайнерам названа Ганна Сямёнаўна Кунцэвіч (на здымку). Зусім нядаўна Ганна Сямёнаўна пераехала ў вёску Чарнагубава, але добры прыклад і зарад энергіі прывезла яна з сабой і перадае мясцовым старажылам. Нельга было не адзначыць і лепшых гаспадароў вёскі. А імі былі прызнаны Зоя Іосіфаўна і Раман Браніслававіч Зяньковічы. На іх падворку, як у сапраўдных гаспадароў, маецца кароўка, конік, свінні і розная птушка. Не засталіся без прызоў і ўдзельнікі выставы.
Шчаслівым стаў дзень 3 ліпеня для мясцовых жыхароў Леаніда Антонавіча Ермаловіча і Рэмы Іосіфаўны Зяньковіч. Так склаўся лёс, што даўно страцілі яны свае палавінкі, а дзеці павырасталі і раз’ехаліся з бацькоўскіх дамоў. Цяжка сёння ў вёсцы жыць аднаму. Вось і вырашылі яны жыць разам, быць адзін аднаму апорай і пад-трымкай. Шаноўныя Рэма Іосіфаўна і Леанід Антонавіч! Няхай зорка шчасця доўга свеціць на вашым жыццёвым шляху, а надзейным спадарожнікам будзе ўдача.
Каля трох гадзін на адным дыханні працягваўся канцэрт, і ніхто не хацеў ісці дадому. А пасля пачалася танцавальная праграма, якая цягнулася да гадзіны ночы. Не абышлося і без сюрпрызаў. Святочны салют у гонар 60-гадовай юбіляркі Браніславы Корбут вельмі ўдала ўпісаўся ў танцавальны вечар.
Патрэбна адзначыць, што на свяце прысутнічалі госці з бліжняга замежжа: Украіны і Крайняй Поўначы. Няхай раскажуць яны ў сябе дома пра тое, як мы ўмеем адпачываць і ладзіць святы, пра нашы традыцыі і звычаі. А яшчэ пра прыгажосць нашай роднай Беларусі і гасціннасць яе людзей.
Мне здаецца, што свята ўдалося і надоўга застанецца ў памяці і сэрцах вяскоўцаў. Хочацца ад ўсёй душы выказаць падзяку старэйшыне вёскі і дэпутату сельскага Савета дэпутатаў Зінаідзе Генадзьеўне Станкевіч, а таксама мясцоваму актывісту Казіміру Яўгенавічу Міхайлоўскаму за вялікую дапамогу ў арганізацыі свята. А чарнагубаўцам пажадаць здароўя, дабрабыту, паболей кветак і сонца ў іх дамах і сэрцах.
Алена ОСТРЫКАВА
старшыня Цімкавіцкага сельвыканкама
Комментарии