[/caption]
Завяршыўся другі этап выбарчай кампаніі. У абласцях і ў Мінску прайшлі сходы, на якіх дэпутаты мясцовых Саветаў абралі членаў Савета Рэспублікі.
На пасяджэнні дэпутатаў мясцовых Саветаў дэпутатаў базавага ўзроўню Мінскай вобласці, якое адбылося ў г. Маладзечна, выбіралі будучых сенатараў ад сталічнай вобласці. Прадстаўнікі дэпутацкага корпусу Міншчыны з’явіліся на пасяджэнне амаль у поўным складзе (640 чалавек) — занадта важнае і адказнае пытанне на парадку дня. Ад таго, якія людзі будуць прадстаўляць інтарэсы сталічнага рэгіёну ў верхняй палаце парламента, шмат у чым залежыць сацыяльна-эканамічнае развіццё вобласці, яе міжнародны імідж, дабрабыт жыхароў. У верхнюю палату парламента выбіраліся вядомыя, паважаныя ў рэгіёне людзі, якія працуюць у розных сферах сацыяльна-эканамічнага комплексу. Кандыдаты ў члены Савета Рэспублікі, якія прадстаўлялі свае праграмы, вядомы не толькі жыхарам Мінскай вобласці. Некаторыя з іх абіраюцца ў верхнюю палату не ў першы раз. Да прыкладу, Барыс Васільевіч БАТУРА, старшыня Мінаблвыканкама, з 2008 года па май 2010-га ўзначальваў Савет Рэспублікі Нацыянальнага сходу Рэспублікі Беларусь. Выступаючы перад дэпутатамі са сваёй праграмай, кіраўнік абласной “вертыкалі” вылучыў галоўную задачу: сенатары павінны ліквідаваць недапрацоўкі ў заканадаўстве для прыцягнення інвестыцый у эканоміку краіны. Барыс Батура адзначыў, што апошнія гады ў Беларусі заканадаўстве было прынята нямала дакументаў, якія зрабілі інвестыцыйны клімат у краіне больш прывабным. “Аднак патэнцыяльных інвестараў усё яшчэ палохаюць недапрацоўкі ў заканадаўстве. Адсюль вынікае бюракратыя, якая адбівае ў іх жаданне ўкладваць грошы ў вытворчасць. Адміністрацыйны націск дарэмны, неабходна ўдасканальваць заканадаўства”, — дадаў ён. Губернатар падкрэсліў, што ўвага сенатараў павінна быць засяроджана на сферах прамысловасці і сельскай гаспадаркі. “Патрэбна больш хуткая мадэрнізацыя гэтых галін, але ўнутраных рэзерваў недастаткова. Калі мы не зможам прыцягнуць у эканоміку замежны капітал, то аб тэхналагічным прарыве і выхадзе на больш высокі жыццёвы ўзровень давядзецца надоўга забыць”, — сказаў ён. “Відавочна, што рэанімаваць некаторыя грувасткія вытворчасці не толькі вельмі дорага, але і бесперспектыўна. Неабходна ствараць невялікія прадпрыемствы, арыентаваныя на выпуск прадукцыі з высокай дабаўленай вартасцю, — адзначыў Барыс Батура. — Паралельна з гэтым павінен ісці працэс больш інтэнсіўнага раздзяржаўлення і перанясення гаспадарчай нагрузкі на прадпрымальніцкія структуры. Толькі далейшая лібералізацыя заканадаўства дасць магчымасць разгарнуць прадпрымальніцкую ініцыятыву і стварыць магутны сектар малога і сярэдняга бізнесу”. Губернатар лічыць, што Мінская вобласць павінна стаць узорам для ўсёй краіны, а сенатары ад рэгіёну ў Савеце Рэспублікі — задаваць тон па ўсіх параметрах у рабоце на карысць рэгіёнаў і дзяржавы. [caption id="attachment_21720" align="aligncenter" width="443" caption="Старшыня райвыканкама А. Жданеня і прадстаўнікі дэпутацкага корпусу Капыльшчыны"]
[/caption]
Сярод кандыдатаў у члены Савета Рэспублікі Лілія Францаўна МАРОЗ, загадчыца Першай Мінскай натарыяльнай канторы, якая з’яўляецца членам Пастаяннай камісіі Міжпарламенцкай Асамблеі дзяржаў — удзельніц Садружнасці Незалежных Дзяржаў. У ліку будучых сенатараў — старшыня Мінскага абластнога Савета дэпутатаў Святлана Міхайлаўна ГЕРАСІМОВІЧ, генеральны дырэктар СТАА «Хенкель Баўтэхнік» Сяргей Рыгоравіч НАВІЦКІ, які ўзначальвае Савет па развіцці прадпрымальніцтва пры Мінскім абл- выканкаме, намеснік генеральнага дырэктара па ідэалагічнай рабоце ААТ «Барысаўскі завод «Аўтагідраўзмацняльнік» Яўген Піліпавіч КАРАШКОЎ, начальнік цэха ААТ «Беларуськалій» Уладзімір Паўлавіч ПАЎЛЮКЕВІЧ, дырэктар ДУ “Палац культуры г. Маладзечна” Святлана Рыгораўна САРОКА.
Гонар прадстаўляць у Савеце Рэспублікі корпус кіраўнікоў сельгаспрадпрыемстваў аказаны старшыні СВК “Агракамбінат “Сноў” Нясвіжскага раёна Мікалаю Вячаслававічу РАДАМАНУ, які быў вылучаны на сумесным пасяджэнні прэзідыумаў Саветаў дэпутатаў і райвыканкамаў Клецкага, Нясвіжскага і Капыльскага раёнаў. Падчас прадстаўлення сваёй праграмы Мікалай Вячаслававіч адзначыў, што ён будзе прыкладваць усе намаганні па вырашэнні асноўных, на яго погляд, задач сельскагаспадарчай галіны: павышэння рэнтабельнасці сельгаспрадукцыі, прыцягнення ў галіну прамых інвестыцый, клопат пра людзей — працаўнікоў вёскі.
Азнаёміўшыся з праграмамі прэтэндэнтаў, абмеркаваўшы кандыдатуры, дэпутаты запоўнілі бюлетэні і апусцілі іх у скрыні для галасавання. Паводле папярэдніх вынікаў, ад Мінскай вобласці абраны ўсе восем членаў Савета Рэспублікі. Дакументы аб выніках выбараў ужо пераданы ў Цэнтрвыбаркам, дзе яны будуць вывучаны на прадмет адпаведнасці заканадаўству. Канчатковыя вынікі выбараў будуць падведзены не пазней за 5 кастрычніка. Да гэтага часу адбудзецца таксама рэгістрацыя выбраных членаў Савета Рэспублікі.
Маргарыта САКОВІЧ
Фота аўтара
Комментарии