360-годдзю атрымання Капылём Магдэбурскага права і было прысвечана тэатралізаванае касцюміраванае мерапрыемства, якое адбылося на Міжнародны дзень музеяў. Але гэта свята не толькі супрацоўнікаў музея, а ў першую чаргу яго наведвальнікаў. Да гэтага дня раённы краязнаўчы музей сумесна з дзіцячай школай мастацтваў прымеркавалі 2-і раённы конкурс-пленэр «Мастакі Капыльшчыны», прысвечаны сёлета гістарычнай даце.
Свята праходзіла на пляцоўцы каля раённага краязнаўчага музея. Надвор’е выдалася выдатнае. На ганку размясціўся ансамбль «Капыльскія дудары». У яго выкананні гучалі кампазіцыі «Свята», «Капыльская легенда», «Песня дудароў», «Ля Каменкі бруістай...», «Жалейка», «Капыльская радзімая зямля» і інш. Навучэнцы дзіцячай школы мастацтваў выконвалі старажытны танец «Мінуэт», а на зялёным лужку праходзіў пленэр. На паперу клаўся вобраз вяшчальніка (ён абвяшчаў прывілей). Гукі сурмы (музычны інструмент) прыцягнулі ўвагу тых, хто сабраўся. Настаў важны момант. Прыйшла пара ўручэння прывілея на Магдэбургскае права намесніку старшыні Капыльскага райвыканкама А. М. Раеўскай. Загучала кампазіцыя «Звіняць цымбалы і гармонік».
Свята на гэтым не скончылася. Пачалося ўзнагароджванне навучэнцаў ДУ «Капыльская дзіцячая школа мастацтваў», якія прымалі ўдзел у пленэры.
Кожны, хто жадаў, мог трапіць у музей і акунуцца ў атмасферу мястэчка. Але для гэтага неабходна было прад’явіць які-небудзь экспанат у абмен на ўваходны білет.
А ў паветры яшчэ доўга луналі гукі кампазіцыі «Перапляс», пад якія музейныя супрацоўнікі ўжо рабілі планы на будучае: «Вось каб правесці такое свята на Замкавай гары!»
алянціна Шуракова,
дырэктар ДУ «Капыльскі раённы краязнаўчы музей»
НА ЗДЫМКАХ: моманты свята.
Фота Сяргея ЛАЗОЎСКАГА
Комментарии