Падышлі аптымальныя тэрміны ўборкі рапсу. На палях раёна шчыруюць дзясяткі збожжаўборачных машын, каб своечасова яго зжаць. Актыўна вядуць гэту работу такія сельгаспрадпрыемствы, як ДП “Грозава-агра” (па стане на 10 ліпеня ўбрана 39%), СГФ “Крыніца” (19%), ААТ “Ціміразеўскі” (13%), РСУП “С “Прамень” (10,5%), “Мажа-Агра”, “Капыльскае” (10%).
У ААТ “Ціміразеўскі” ўборку рапсу распачалі літаральна пяць дзён таму. Пасевы важнай сельскагаспадарчай культуры другі год запар займаюць 800 га.
Пачыналі жніво тры камбайнавыя экіпажы, а ўжо на дадзены момант уборку вядуць шэсць машын. Абумоўлена гэта паспяваннем рапсу.
аграном-аграхімік Святлана Лазук расказвае: “Крыху папсавалі стан пасеваў моцныя вятры, ёсць палегласці. Таму месцамі зверху культура сухая, а знізу — вільготная. У гаспадарцы трэці год запар культывуем гатункі беларускай селекцыі — “Зорны” і “Дабрадзей”, якія поўнасцю сябе апраўдваюць. А вось шматлікія гібрыды рапсу часта проста не вытрымліваюць нашы непрадказальныя зімы. Вышэйзгаданыя гатункі больш адаптаваныя да такіх умоў надвор’я”.
Каб паскорыць паспяванне рапсу, у “Ціміразеўскім” выкарыстоўваюць дастаткова эфектыўны спосаб — прарэджванне. Фактычна, на палях “выстрыгаюць” палосы, што дазваляе паветру падсушваць культуру знізу. На пытанне, што ж паўз-дзейнічала на даволі неблагі ўраджай рапсу, атрымаў просты, але вычарпальны адказ — захаванне тэхналогіі. Увосень сяўбу выканалі ў аптымальны тэрмін, потым своечасова правялі апрацоўку азотам, мікраэлементамі, гербіцыдамі і г. д. Да таго ж, культура з зімоўкі выйшла ўдала: не назіралася вымачак і вымярзання раслін на палях.
Убраць рапс без страт цяжка. Звязана гэта са спецыфічнымі асаблівасцямі расліны: дробныя памеры насення і высокая іх сыпкасць, неадначасовае паспяванне нават на адным і тым жа полі. Гэтыя акалічнасці ў сельгаспрадпрыемстве таксама стараюцца ўлічваць. “Цяпер ідзе ўборка палёў ва ўрочышчы Ракіні. Гэтыя плошчы выбраны невыпадкова — участкі знаходзяцца на пясчанай глебе, — тлумачыць дырэктар ААТ “Ціміразеўскі” Аляксандр Турбан. — Таму рапс тут аптымальна гатовы для ўборкі. На дадзеным этапе ўраджайнасць складае 20-22 ц/га, але ёсць упэўненасць, што гэта лічба будзе значна вышэйшая”.
Нягледзячы на тое, што рапс — культура рэнтабельная, плошчы пад сяўбу ў гаспадарцы павялічваць не плануюць. “Для нас 800 гектараў гэтай культуры дастаткова, таму што да ўборкі збожжавых управімся ўшчыльную. Цяпер ужо ідзе реалізацыя атрыманага ўраджаю”, — адзначыў Аляксандр Аляксандравіч.
Сёлета сельгаспрадпрыемству для выканання дзяржзаказу неабходна паставіць 800 тон на Слуцкі КХП. Яшчэ 400-500 т атрымае клецкі біярапспрадукт. І з рэалізацыяй астатняга ўраджаю гэтай культуры, упэўнены ў гаспадарцы, праблем не будзе.
Сяргей ЛАЗОЎСКІ
Фота аўтара
Комментарии