У летні час бібліятэка праводзіць работу пад дэвізам: «У ведаў няма канікул» і накіроўвае яе на тое, каб як мага лепш арганізаваць дзіцячы вольны час.
Нашы фонды маюць у дастатковай колькасці пазнавальную літаратуру, а таксама літаратуру для праграмнага пазакласнага чытання, якая чакае сваіх чытачоў. Падчас канікул бібліятэкі вядуць сваю работу сумесна з летнімі аздараўленчымі пляцоўкамі і лагерамі.
2012 год адзначаны 130-годдзем з дня нараджэння народных песняроў Янкі Купалы і Якуба Коласа. Менавіта гэтым юбілеям прысвечаны літаратурная гадзіна «Знакавыя постаці Беларусі», да 165-годдзя з дня нараджэння Зоф’і Тжашчкоўскай наведвальнікам будзе прапанаваны відэафільм «Шляхетная пані Капыльскай зямлі», да Года кнігі будуць прымеркаваны мерапрыемствы «Роля кнігі ў жыцці чалавека» і «Летапіс беларускага слова», а бібліяграфічны экскурс «Новыя кнігі новага стагоддзя» пазнаёміць вас з самымі цікавымі кнігамі апошніх гадоў. Напярэдадні свята вызвалення Беларусі ад нямецка-фашысцкіх захопнікаў наведвальнікам будзе прапанаваны патрыятычна-краязнаўчы тур «Сцежкі, апаленыя вайной» і тэматычная гадзіна «Беларусь мая, родны край».
Дзіцячая бібліятэка прапануе літаратурнае асарці па творах Эдуарда Успенскага «Дзядзя Фёдар і яго сябры», нестандартны ўрок «Падарожжа па краіне Маршака». Аматарам казак прапануецца казачны калейдаскоп-падарожжа па самых цікавых казках. Вусны часопіс «Цвяроза жыць» і слайд-фільм «Атручаная душа» па прафілактыцы шкодных звычак нагадаюць вам пра тое, як літаратурныя героі спраўляюцца са сваімі недахопамі.
Ірына ПЯТРОВІЧ,
загадчыца аддзела абслугоўвання і інфармацыі Капыльскай ЦРБ імя А. Астрэйкі
Комментарии