Сапраўдны музычны падарунак для гледачоў, якія сабраліся ў зале раённага Цэнтра культуры, зрабілі выхаванцы і выкладчыкі аддзялення духавых і ўдарных інструментаў Капыльскай дзіцячай школы мастацтваў. Справаздачны канцэрт, што падрыхтавалі музыканты, успрымаўся на “ўра” з першага нумара праграмы.
Вядучым мерапрыемства стаў выкладчык ДШМ Аляксандр Булакевіч, які выступаў яшчэ і як музыкант. З задавальненнем прысутныя паслухалі інструментальныя сольныя нумары, вакальныя кампазіцыі, выступленне ансамбляў юных выхаванцаў школы, якія навучаюцца ў добравядомых выкладчыкаў Льва Канапляніка, Аляксандра Булакевіча, Кірыла Марыніча і Дзмітрыя Масілевіча. Горача гледачы сустракалі выступленне ўзорнага эстраднага аркестра школы мастацтваў, асабліва калі вядучы расказаў пра нядаўна атрыманы ім гран-пры на міжнародным фестывалі джазавай музыкі “Джаз-тайм” у г. Салігорску.
Напрыканцы справаздачнага канцэрта дырэктар ДШМ Уладзімір Чаркас падзякаваў за майстэрства і пажадаў поспехаў юным музыкантам і выкладчыкам.
Сяргей ЛАЗОЎСКІ
Комментарии