Сваімі меркаваннямі дзеліцца начальнік аддзела статыстыкі Капыльскага раёна Галіна ЧЫГІР
Самае запамінальнае
У 2012 годзе аддзелам статыстыкі Капыльскага раёна праводзяцца чатыры выбарачныя абследаванні па розных відах дзейнасці. З 20 лютага пачалося апытанне сем’яў па вывучэнні праблемы занятасці насельніцтва. Пры правядзенні абследаванняў мы не можам абысціся без дапамогі тых, хто трапіў у выбарку. Хачу яшчэ раз падзякаваць жыхарам Пацейкаўскага, Цімкавіцкага, Бабаўнянскага сельскіх Саветаў, якія згадзіліся з намі супрацоўнічаць, за іх разуменне, гатоўнасць даць неабходную інфармацыю, цярпенне, добразычлівасць.
Радуе
Як кожную матулю і бабулю ў першую чаргу мяне радуюць поспехі маіх дзяцей і ўнукаў. Нават самая маленькая іх перамога ці дасягненне прыносяць велізарную радасць. Напрыклад, унучкі (7 і 6 гадоў) нядаўна навучыліся катацца на каньках, а двухгадовы ўнучак асвоіў лыжы.
Таксама радуе спакойная і зладжаная работа нашага калектыву, адказнасць і стараннасць усіх рэспандэнтаў статыстычнай справаздачнасці.
Прымушае задумацца
Бываюць моманты, калі думаеш пра хуткаплыннасць жыцця. Часам штодзённыя клопаты не дазваляюць надаваць пэўнай увагі сваім самым родным і блізкім людзям, сябрам, калегам.
Запісаў Сяргей КОЗЕЛ
Комментарии