Вялікая колькасць людзей з самага ранку 16 жніўня з кветкамі ў руках прыйшлі на старыя «польскія» могілкі ў Капылі. У гэты дзень адбылася ўрачыстасць у гонар Святога Роха. Па традыцыі вернікі абходзілі капліцу тры разы, маліліся за памерлых, ускладалі кветкі на могілкі, пісалі запіскі і ставілі свечкі.
- Святы Рох з’яўляецца апекуном ад розных хвароб, - кажа пробашч
касцёла Святых Пятра і Паўла ў г. Капылі Андрэй Калядка. – Многія вераць у цуд, які адбыўся ў 90-х гадах. Некалі да каплічкі Св. Роха прывезлі жанчыну, якая не магла хадзіць. Людзі, якія яе трымалі, разам абышлі вакол капліцы тры разы, а пасля занеслі яе ўнутр. Пасля жанчына выйшла на сваіх нагах. Трэба адзначыць, што ў час эпідэміі каронавіруса вернікі таксама маліліся пра заступніцтва Святога Роха. Мы заўсёды звяртаемся з падзякай да ўсіх прысутных. Вельмі добра, што яны прыходзяць, але ж самае галоўнае, каб яны паспавядаліся і прынялі святую Камунію. Вельмі важна, каб у кожнага з іх была моцная вера.
Айцец Андрэй Калядка правёў урачыстую Імшу, вернікі разам з ім памаліліся за святога Роха, які некалі дапамагаў хворым.
Пасля па жаданні прысутных адбылося асвячэнне могілак.
Наталля ДАВЫДЗЕНКА
Фота аўтара 
Комментарии