Сваімі меркаваннямі дзеліцца мастацкі кіраўнік Лоцвінскага СДК, кіраўнік клубнага аб’яднання нацыянальнай кухні «Лоцвінскія ўдалухі» Галіна ДРОЖЖА.
САМАЕ ЗАПАМІНАЛЬНАЕ
– У мінулым годзе клубнае аб’яднанне нацыянальнай кухні “Лоцвінскія ўдалухі” ўдзельнічала ў святах, што ладзіліся як на тэрыторыі Капыльскага раёна, так і за яго межамі. Асабліва ганарова было прыняць удзел у міжнародным кулінарным фестывалі “Мотальскія прысмакі”, які прайшоў у Іванаўскім раёне Брэсцкай вобласці, а таксама рэспубліканскім свяце працаўнікоў вёскі “Дажынкі-2011” у г. Маладзечне.
АБНАДЗЕЙВАЕ
– Сёлета ў клубнага аб’яднання нацыянальнай кухні ёсць на-дзея атрымаць званне “народны”.
РАДУЕ
– Радуе работа і яе вынікі. Усіх удзельнікаў аб’яднання “Лоц-вінскія ўдалухі” аб’ядноўвае адно – энтузіязм і вялікая любоў да беларускай нацыянальнай кухні і страў сваёй мясцовасці. А дапамагаюць мне ў гэтым Ірына Хмялеўская, Ганна Віршыц, Жанна Пісарык, Жанна Юха, Соф’я Шыманская, Ала Жылка, Наталля Клочка, Валянціна Шыманская. Напярэдадні Калядных свят за высокія творчыя дасягненні ў 2011 годзе клубнае аб’яднанне Лоцвінскага СДК было адзначана спецыяльнай прэміяй Мінскага аблвыканкама. Заўсёды прыемна, калі тваю шматгадовую працу ацэньваюць.
А ў асабістым жыцці радуе тое, што ўсе мае родныя жывыя, здаровыя і ўсё ў іх добра.
ХВАЛЮЕ
– Вельмі непакоіць дэмаграфічная сітуацыя на вёсцы, і тое, што тут вельмі мала нараджаецца дзетак. Хвалюе і насцярожвае п’янства на сяле. Балюча бачыць здаровых жанчын і мужчын, якія маглі б столькі сваёй энергіі патраціць на добрую справу, а яны п’юць і што яшчэ больш прыкра – не займаюцца выхаваннем сваіх непаўналетніх дзяцей.
Запісала Таццяна БОХАН
Комментарии