Працаваць сумесна і плённа вырашылі падчас сустрэчы члены Маладзёжных саветаў Капыльскай і Клецкай раённых арганізацый Беларускага прафесійнага саюза работнікаў адукацыі і навукі. Яна праходзіла пад дэвізам: «Адзінства ўсіх і ўнікальнасць кожнага».
— Асноўная мэта нашага мерапрыемства — наладжванне кантактаў для далейшага ўзаемнага супрацоўніцтва, — адзначыла старшыня Капыльскага райкама прафсаюза работнікаў адукацыі і навукі
Марына Крэпская. — Прафсаюз — гэта абарона, шматгранная і надзейная. Ён заўсёды прыходзіць на дапамогу чалавеку ў цяжкую хвіліну, прычым дапамагае не толькі парадай, але і справай. Менавіта таму з кожным годам колькасць людзей, якія даверыліся прафсаюзнай арганізацыі, становіцца ўсё больш. Прыходзячы на сваё першае працоўнае месца, актыўна ўступае ў прафсаюз і моладзь. А па-іншаму і быць не можа, бо менавіта так маладыя людзі атрымліваюць наймацнейшую падтрымку ва ўсіх сваіх пачынаннях і імкненнях, перамогах і дасягненнях, да таго ж, не толькі маральную, але і матэрыяльную.
Гасцям з Клецка была прапанавана насычаная праграма. Па-першае, яны наведалі экспазіцыю музея 17-га Цімкавіцкага Чырванасцяжнага пагранічнага атрада ў Цімкавіцкай сярэдняй школе імя Кузьмы Чорнага.
У Капылі для ўдзельнікаў мерапрыемства арганізавалі экскурсію па гімназіі ў форме квэста. Пераможцы раённага конкурсу «Шлях у прафесію» прадэманстравалі конкурсныя нумары. Госці таксама паказалі свае таленты.
Завяршылася сустрэча экскурсіяй па ўнікальных мясцінах горада з ускладаннем кветак да памятных месцаў і ў сядзібу «Мядовая заімка», што створана Капыльскім дзяржаўным каледжам, дзе ўсіх пачаставалі салдацкай кашай і гарачым чаем.
— Прафсаюз і моладзь — гэта адзінае цэлае: яны працуюць у адзінстве, разам глядзяць у заўтрашні дзень, пераадольваюць цяжкасці, прафесійна растуць. Адным словам, усё робяць разам. І абвергнуць гэта немагчыма! — падвяла вынік старшыня галіновай прафсаюзнай арганізацыі Клеччыны
Марына Плотка.
Сяргей КОЗЕЛ
Фота аўтара
Комментарии