18 снежня беларускія каталіцкія скаўты даставілі Бэтлеемскае святло міру ў Хрысціянскі сацыяльны цэнтр дабрачыннай місіі Добрага Самараніна ў Мінску.
Як паведамляецца на сайце дабрачыннай каталіцкай місіі Добрага Самараніна, святая Імша Чацвёртай нядзелі Адвэнту ў капліцы Хрысціянскага сацыяльнага цэнтра распачалася з унясення лампады, запаленай ад агню на месцы Нараджэння Хрыста ў Бэтлееме.
Гэты агонь штогод дастаўляецца ў Аўстрыю, а адтуль скаўты перадаюць яго ў розныя краіны свету ў межах акцыі Бэтлеемскае святло міру.
Каталіцкія скаўты Беларусі даставілі агонь у Хрысціянскі сацыяльны цэнтр і перадалі ў рукі арцыбіскупа эмэрыта
Тадэвуша Кандрусевіча, які ўнёс яго ў капліцу, дзе ўзначаліў цэлебрацыю святой Імшы.
А 19 снежня Агонь міру, запалены ад нязгаснай лампады ў базыліцы Нараджэння Пана ў Бэтлееме, прыбыў у катэдральную базыліку святога Францішка Ксаверыя ў Гродне.
Як паведамляе Прэс-служба Гродзенскай дыяцэзіі, прадстаўнікі польскага згуртавання скаўтаў урачыста перадалі агонь біскупу Гродзенскаму
Аляксандру Кашкевічу. Звяртаючыся да ўсіх прысутных у гро-дзенскай катэдры, пастыр Касцёла на Гродзеншчыне, між іншым, адзначыў: «Гэты агонь нагадвае, што ўжо хутка мы будзем адзначаць поўныя радасці і хвалы святы Божага Нараджэння». Іерарх падкрэсліў, што з гэтага святла, якое сімвалізуе Езуса Хрыста, «мы хочам чэрпаць святло для саміх сябе, для кожнай і кожнага з нас».
Падрыхтавала Дзіяна ТКАЧЭНКА
Комментарии