На парадку дня ХVII сесіі раённага Савета дэпутатаў, якая адбылася 11 лістапада, было разгледжана пытанне аб выкананні патрабаванняў Дэкрэта Прэзідэнта Рэспублікі Беларусь №10 ад 6 жніўня 2009 г. «Пра стварэнне дадатковых умоў для інвестыцыйнай дзейнасці ў Рэспубліцы Беларусь». Народныя выбраннікі пабывалі на двух прадпрыемствах, дзе пазнаёміліся з ходам яго рэалізацыі. Пройдзем па маршруце дэпутатаў.
1.«БетонБокс»
Першым на маршруце стала сумеснае таварыства з абмежаванай адказнасцю «БетонБокс», якое ўзначальвае Уладзімір Вараб’ёў. Прадпрыемства разлічана на вытворчасць малочнатаварных фермаў, лагістычных цэнтраў, сховішчаў для агародніны, гіпер-, супермаркетаў. На наступны год плануецца ўвесці ў строй цэх па будаўніцтве жылля. На дадзены перыяд на прадпрыемстве створана 107 працоўных месцаў. Але ў хуткім часе плануецца, што на вытворчасці будзе працаваць больш за 200 чалавек. Прадукцыя “БетонБокса” запатрабавана ўжо цяпер, частка яе сертыфікавана, частка праходзіць сертыфікацыю. Дэпутаты прайшлі па тэрыторыі прадпрыемства, пазнаё-міліся з работай новага сучаснага бетона-змешвальнага вузла, прадукцыйнасць якога складае 85 м3 бетону ў дзень, наведалі склад інертных матэрыялаў. Дырэктар прадпрыемства расказаў пра некаторыя асаблівасці, тэхналагічныя аспекты гэтай беларуска-італьянскай вытворчасці. Таксама ён адзначыў, што адначасова ідзе рамонт, мадэрнізацыя і будаўніцтва новых карпусоў, добраўпарадкаванне тэрыторыі. У перспектыве фірма «БетонБокс» будзе не толькі выпускаць жалезабетонныя канструкцыі для будаўніцтва жывёлагадоўчых памяшканняў і іншых збудаванняў, але і весці іх мантаж. Магутнасці завода дазваляюць закрыць патрэбнасці ў такіх вырабах усёй рэспублікі.
2. «Капыльская вытворчасць будаўнічых сістэм»
Яшчэ адно сучаснае прадпрыемства, якое працуе на тэрыторыі раёна, - сумеснае таварыства з абмежаванай адказнасцю «Капыльская вытворчасць будаўнічых сістэм». Раней гэта быў вытворчы ўчастак ТАА «Сармат», а галаўная кампанія знаходзілася ў г. Мінску. З сакавіка 2011 года – гэта ўжо самастойная юрыдычная асоба. Аб рабоце прадпрыемства падрабязна расказаў дырэктар Мікалай Барысаў. Дэпутаты даведаліся, што на вытворчасці выпускаюцца розныя віды будаўнічых матэрыялаў для ўнутранага і вонкавага аздаблення жылля: будаўнічыя сумесі, уцяпляльнікі, таксама наладжаны выпуск фарбы. Летась набылі маёмасны комплекс завода драўляных вырабаў, дзе ідзе аднаўленне цэха па дрэваапрацоўцы, выконваюцца рамонтныя работы іншых памяшканняў для далейшага іх выкарыстання ў вытворчасці.
Сяргей ЛАЗОЎСКІ
Фота аўтара
Комментарии