У скарбонцы дасягненняў вакальна-інструментальнага ансамбля Капыльскага раённага цэнтра культуры «Замкавая гара» яшчэ адна знакавая ўзнагарода: ГРАН-ПРЫ фестывалю вакальна-інструментальных ансамбляў «ВІА-ФЭСТ 2022».
[caption id="attachment_119138" align="alignnone" width="865"]
■ Старшыня журы Алег Елісеенкаў ( у цэнтры) з уладальнікамі ГРАН-ПРЫ Аляксеем Вайцешыкам, Віталем Самахвалавым, Аляксандрам Куршавым і Андрэем Раеўскім[/caption]
Такое мерапрыемства праходзіла ўпершыню і сабрала прадстаўнікоў розных раёнаў і абласцей Беларусі, якія выконваюць эстрадную музыку любых напрамкаў. Удзельнікаў фестывалю-конкурсу вакальна-інструментальных ансамбляў ацэньвала прафесійнае журы, старшынёй якога стаў заслужаны дзеяч мастацтваў Рэспублікі Беларусь, Ганаровы грамадзянін Мала-дзечанскага раёна, кампазітар Алег Елісеенкаў.
Два дні ў Палацы культуры г. Маладзечна на «ВІА-ФЭСТ 2022» у выкананні вакальна-інструментальных ансамбляў, рок-гуртоў і кавер-бэндаў гучалі ўсімі вядомыя сусветныя хіты і аўтарскія песні. Кожная група, якая выходзіла на сцэну, дарыла гледачам не толькі выдатна выкананыя музычныя нумары, але і неверагодны зарад пазітыўнай энергіі. Музыканты стварылі на сцэне Палаца культуры сапраўдную феерыю мелодый і рытмаў.
У рэпертуары «Замкавай гары» шмат песень і музычных кампазіцый. За час існавання было закранута некалькі тэм: патрыятычная, сацыяльная (прысвечаная праблеме наркаманіі), але больш за ўсё — лірычная, бо на каханні і свет трымаецца.
— Галоўная ўмова канцэрту — павінна было прадугледзець праграму выступлення не больш за 15 хвілін, — расказвае кіраўнік «Замкавай гары» Андрэй Раеўскі. — Паколькі нам трэба было прадставіць калектыў з разнастайнай музычнай палітрай, ад лірыкі да складаных музычных форм, як у музыцы, так і ў вершах, таму былі выбраны тры нашы аўтарскія кампазіцыі — «Чуеш», «Неба падару» і «Ноч». Забягаючы крыху наперад, адзначу, што ўсе ўдзельнікі калектываў падарылі пазітыўныя эмоцыі і выдатны настрой, а конкурс праходзіў у творчай і сяброўскай атмасферы. І якое было здзіўленне, калі нас запрасілі на гала-канцэрт, дзе змаглі пачуць выступленне лепшых канкурсантаў, а таксама сваё майстэрства паказалі члены журы і ганаровыя госці фестывалю. Ведаеце, кожнае выступленне артыста — гэта хвалюючы момант, а выхад на сцэну ў творчым конкурсе — удвая. Калегам раю прымаць удзел у такіх выпрабаваннях, каб зразумець і адчуць увесь смак гэтай прафесіі.
І вось вакальна-інструментальнаму ансамблю «Замкавая гара» прапанавалі закрыць гэта мерапрыемства. Тады яго ўдзельнікі і зразумелі, што журы высока ацаніла іх выступленне і творчасць.
— Інтрыга захоўвалася да апошняга, — працягвае Андрэй. — Журы выпала няпростая задача вызначыць пераможцу, бо кожны калектыў па-свойму ўнікальны. Аднак аднагалосным рашэннем мы сталі ўладальнікам ГРАН-ПРЫ фестывалю. Вельмі цёплыя словы за нашу творчасць, высокае выканальніцкае майстэрства, цудоўнае кампазітарскае вырашэнне, гарманічныя мелодыі і словы выказаў старшыня журы Алег Елісеенкаў. Пры гэтым адзначыў: «Хлопцы, вы, мабыць, хочаце адняць наш хлеб». Несумненна, такая адзнака дае нам матывацыю на далейшую плённую працу. Лічу, што перамога ў такім конкурсе — вельмі ганарова. І гэта не толькі наша дасягненне, але і добры здабытак творчых дасягненняў Капыльшчыны ўвогуле. Хутка мы парадуем прыхільнікаў нашай творчасці дзвюма новымі музычнымі кампазіцыямі. Нам ёсць куды ісці і над чым працаваць, таму што музыка — гэта шлях на ўсё жыццё.
Таццяна БОХАН 
Комментарии