Капыль рыхтуецца да культурна-спартыўнага фестывалю «Вытокі. Крок да Алімпу».
Напярэдадні мы вырашылі перагарнуць некаторыя старонкі гісторыі спартыўнага руху на Капыльшчыне. Дапамогуць нам у гэтым людзі, вядомыя ў сферы фізічнай культуры і спорту раёна — былы начальнік аддзела фізічнай культуры, спорту і турызму райвыканкама
Мікалай Жук, заслужаны трэнер БССР
Уладзімір Рыбак і настаўнік фізкультуры СШ №2 г. Капыля
Іван Гурыновіч.
[caption id="attachment_116942" align="alignnone" width="840"]
■ Ветэранам спорту Уладзіміру Рыбаку, Мікалаю Жуку і Івану Гурыновічу ёсць пра што ўспомніць[/caption]
Першае, што ўзгадалі ветэраны спорту з 80-90-х гадоў мінулага стагоддзя, гэта ўвядзенне штодзённых урокаў фізічнай культуры ў СШ №2 г. Капыля. Ініцыятарам адзінага ў БССР эксперыменту выступіў тагачасны дырэктар
Барыс Багдановіч. Урокі скараціліся да 40 хвілін. Пачалі праводзіцца рухомыя перапынкі, ранішняя зарадка пад музыку, рытмічная гімнастыка. Заняткі таксама праводзіліся ў басейне, на фізкультурна-аздараўленчым комплексе, у зоне адпачынку. Эксперымент праводзіўся пад наглядам медыкаў. У школе была створана кафедра настаўнікаў фізічнай культуры, якая складалася з дзесяці чалавек.
[caption id="attachment_116941" align="alignnone" width="840"]
■ Падчас рухомага перапынку, 80-я гады XX ст.[/caption]
— Увядзенне штодзённых урокаў фізкультуры дало станоўчыя вынікі: нашы выхаванцы займалі прызавыя месцы на розных спаборніцтвах, — узгадвае Іван Гурыновіч. — Памятаю, як некаторыя каманды баяліся з намі сустракацца, бо нашу падрыхтоўку параўноўвалі са спартыўнай школай.
На рахунку капылян — удзел у гульнях «Вас выклікае Спартландыя!», «Вясёлыя старты» і іншых. Яны прымалі ў сябе і былі ў гасцях у равеснікаў з Расіі, Украіны, Узбекістана і інш.
Не маглі не ўспомніць ветэраны і пра фізкультурна-аздараўленчы комплекс (цяпер цэнтр). Ідэя яго будаўніцтва ўзнікла ў намесніка старшыні па будаўніцтве райвыканкама
Леаніда Васілевіча.
— Гэта была, можна сказаць, усенародная будоўля, — адзначае Уладзімір Рыбак. — У ёй задзейнічалі ўсе арганізацыі і прадпрыемствы Капыля, штодзень працавалі па 15-20 чалавек. І вось з’явіўся цудоўны будынак са спартыўнымі заламі, басейнам, стадыёнам, лыжаролернай трасай, які карыстаецца папулярнасцю ў капылян і не толькі.
Шмат гаварылася і пра біятлон, вынікі ў гэтым відзе радуюць і сёння. Але гэта тэма будзе падрабязна закранута ў наступных публікацыях.
Значная ўвага ў апошнія дзесяцігоддзі мінулага стагоддзя надавалася развіццю футбола. Трэба адзначыць, што гэты від на высокім узроўні падтрымліваўся мясцовай уладай. Яго прыхільнікамі былі старшыня райвыканкама
Уладзімір Сасноўскі і яго намеснік
Уладзімір Аляшкевіч. Дарэчы, апошні пасля кожнага тура пісаў справаздачу ў раённую газету, аналізуючы ўсе моманты гульні.
[caption id="attachment_116940" align="alignnone" width="840"]
■ Футбольная каманда «Маналіт» завода жалезабетонных вырабаў[/caption]
— У Кубку раёна па футболе прымала ўдзел 31 каманда, першынство праводзілі з выездам у сельскія населеныя пункты, — успамінае Мікалай Жук. — Вялікі ўклад у развіццё гэтага віду зрабілі
Аляксандр Семяновіч, які ўзначальваў легендарны клуб «Меліяратар» і заўсёды яго суправаджаў, а таксама
Аляксандр Міхайлоўскі з ПМК-11, пад кіраўніцтвам якога двойчы на тыдзень праходзілі трэніроўкі. Прыемна адзначыць, што на развіццё клуба быў устаноўлены мясцовы збор з прадпрыемстваў і арганізацый, якія з’яўляліся яго заснавальнікамі.
Гэта толькі асноўныя факты, што ўзгадалі ветэраны. Увогуле ж іх успаміны пра любімы занятак і блізкіх людзей бясконцыя.
Сяргей КОЗЕЛ
Комментарии