Адкрываючы чарговае пасяджэнне камісіі па справах непаўналетніх пры Капыльскім райвыканкаме, намеснік старшыні КСН Зоя Дайняк падкрэсліла, што пасяджэнне будзе чыста прафілактычным. А неабходнасць у гэтым ёсць, і вельмі вострая. “У нас, — сказала Зоя Леанідаўна, — самая высокая ўдзельная вага злачыннасці ў Мінскай вобласці”. Яна прывяла некаторыя лічбы, што тычацца работы КСН. Так, за першае паўгоддзе бягучага года камісіяй разгледжаны 231 матэрыял (за аналагічны перыяд 2010 г. — 164), з якіх — на дарослых — 138 (2010 г. — 81), на непаўналетніх — 93 (2010 г. — 72). Усяго праведзена 23 пасяджэнні КСН супраць 21 у 2010 г.
Згодна з Дэкрэтам №18 адабраны 26 дзяцей у бацькоў з нядобранадзейных сем’яў (2010 г. —12). Непаўналетнімі за І-е паўгоддзе здзейснена 16 крадзяжоў, 2 грабяжы, 1 угон аўтатранспарту.
— За кожнай з гэтых лічбаў, — сказала Зоя Леанідаўна, — лёс маладога чалавека, за які яшчэ можна пазмагацца, даць яму шанс, які, дарэчы, мае кожны. Часта падлетак становіцца ахвярай абставін, іншы раз на супрацьпраўныя дзеянні яго правакуюць сябры, сям’я… Так-так, менавіта сям’я, паколькі дзіця — яе адлюстраванне, адтуль яны чэрпаюць асноўныя жыццёвыя прынцыпы і правілы паводзін у грамадстве. Але не ўсе бацькі з’яўляюцца прыкладам для сваіх дзяцей.
Адзін за другім заходзілі яны ў залу пасяджэнняў райвыканкама, каб адказаць на пытанне: “Што ўжо зроблена, каб вярнуць у сям’ю адабраных і змешчаных у сацыяльны прытулак дзяцей?” Такое пытанне камісія задала, напрыклад, Марыне Б., дзіцё ў якой адабралі 13 чэрвеня, Аксане Д. — маці трох дзяцей, Аляксандру К., двое яго дзяцей таксама змешчаны ў прытулак. Сур’ёзная размова адбылася з Уладзімірам Л., бацькам трох дзяўчынак. Тое ж самае тычыцца і Вольгі Р., маці трох дзяцей, якая цвёрда ўпэўнена, што “нармальна займаецца выхаваннем дзяцей”.
Алену К. добра ведаюць на Капыльшчыне. Маці чатырох дзяцей, двое з якіх ужо паўналетнія, нават не памятае, калі ў яе адабралі дзяцей. Жанчына можа запіць так, што забывае аб сям’і. За 2 месяцы на рабоце была толькі тры дні. На момант рэйдавай праверкі дамашніх умоў, у якіх утрымліваюцца дзеці, члены КСН былі ўражаны тым, што дома з прадуктаў харчавання нічога не было…
Увогуле, падчас такіх праверак становіцца не па сабе, калі заходзіш у хаты, якія даўно перасталі быць увасабленнем утульнасці. Як рэагаваць на маладую маці, якая атрымала адрамантаваны дом і здолела за кароткі час ператварыць яго ў хлеў? Абарваныя шпалеры, тлустыя плямы на сценах, мурзатая газавая пліта, даўно нямыты, брудны посуд. карацей кажучы, скрозь антысанітарыя. Такая ж неахайнасць прывіваецца і яе дзецям.
Сціпла і сарамліва выглядае і 14-гадовая Жэня з в. Бабоўня. Яна шукае любую магчымасць, каб вырвацца ў Капыль, а там, як кажуць, адарвацца па поўнай. Вось і ў апошні раз яе затрымалі ў гарадскім парку ў… нецвярозым стане…
Не стану стамляць чытачоў пералікам іншых асоб, што былі заслуханы на пасяджэнні камісіі. Іх гісторыі падобыя, нібы тыя блізняты. У аснове — неадольная цяга да спіртнога, і як вытворныя — беспрынцыповасць, безадказнасць, абыякавасць — гэткі заганны ланцуг. Парваць яго будзе цяжка але парваць яго неабходна, дзеля будучага нашага грамадства.
Уладзімір СКРЫПІНСКІ
Комментарии