22 чэрвеня ў вёсцы Слабада-Кучынка ў 4 гадзіны раніцы пачаўся мітынг-рэквіем, прысвечаны Дню ўсенароднай памяці ахвяр Вялікай Айчыннай вайны.
Жалобная цырымонія пачалася з ускладання кветак да помніка загінуўшым землякам. Ганаровую Вахту занялі члены клуба «Патрыёты Радзімы». Адкрыў мітынг намеснік старшыні рэспубліканскага Савета ГА «Беларускі саюз афіцэраў» палкоўнік у адстаўцы Васіль Скрыннікаў:
— Дзень 22 чэрвеня застаўся ў памяці народнай не проста як фатальная дата, а як рубеж, пачатак адліку доўгіх, страшных, вогненных 1418 дзён Вялікай Айчыннай вайны. За мір заплачана жыццямі 27 мільёнаў савецкіх грамадзян, а Беларусь страціла кожнага трэцяга. Мы нізка схіляем галовы перад усімі, хто не вярнуўся з вайны.
Памяць загінуўшых прысутныя ўшанавалі хвілінай маўчання, запалілі свечкі. Паміж выступленнямі гучалі мелодыі «Священная война», «Братские могилы» і «Журавли».
Аб трагічных старонках сваёй сям’і расказала старшыня ветэранскай арганізацыі аддзяленя «Слабада-Кучынка» ААТ «Старыца-Агра» Святлана Астрэйка. Гэта ў яе 6 жніўня 1944 года ў адным баі пры вызваленні Польшчы загінулі бацька Іван і дзядзька Фёдар Руднікі.
Дэпутат Капыльскага раённага Савета дэпутатаў па Слабада-Кучынскай акрузе № 5 Барыс Дзенісюк напомніў аб гераічным подзвігу 168 землякоў, імёны якіх выбіты на помніку. Загадчык Слабада-Кучынскай бібліятэкі-клуба Валянціна Барташэвіч узгадала мірных жыхараў — ахвяр фашысцкага тэрору. Дарэчы, Валянціна Зянонаўна падрыхтавала 41 кветку (вырасціла на сваім участку).
Ад «дзяцей вайны» выступіла дачка франтавіка і былы сакратар партыйнай арганізацыі саўгаса «Крыніца» Зоя Салановіч.
— Святы абавязак цяперашняга пакалення захаваць і перадаць нашчадкам памяць аб подзвігу, аб мужнасці тых, хто змагаўся за Радзіму, — воінаў, партызан, падпольшчыкаў і працаўнікоў тылу, — адзначыла Зоя Емяльянаўна.
Затым эстафету памяці прынялі навучэнцы Слабадакучынскай СШ Марыя Дашкевіч і Мікіта Коршук, якія прачыталі вершы, прысвечаныя героям вайны, выказалі словы шчырай падзякі ветэранам Вялікай Айчыннай вайны.
Наш кар.
Комментарии